Епіскап Полацкі і Глыбоцкі Ігнацій надае вялікае значэнне таму, каб свяшчэннаслужыцелі як мага часцей сустракаліся з прыхаджанамі храмаў, маліліся разам з імі, вялі даверлівыя гутаркі і размовы.
Цяпер у праваслаўных хрысціян Вялікі пост, які пачаўся 27 лютага і закончыцца 15 красавіка напярэдадні Уваскрэсення Хрыстова. У гэты час епіскап Ігнацій ажыццяўляе паездкі па Полацкай епархіі. Уладыка 17 сакавіка наведаў царкву іконы «Усіх смуткуючых Радасць» у нашым гарадскім пасёлку, каб разам з шаркаўшчынскімі вернікамі памаліцца Усявышняму за мір і шчасце на зямлі. У храме епіскапа сустракалі протаіерэі Віктар Валашчук, Пётр Бараноўскі, Васілій Стрыжнёў, Мікалай Гуцко, намеснік старшыні райвыканкама Юрый Васілеўскі, а таксама прыхаджане царквы. Епіскап Ігнацій ужо не першы раз наведвае гэта святое месца, дзе, па словах святара, дыхаецца лёгка і адчуваецца еднасць з Богам.
Уладыка прыняў удзел у літургіі, якая праводзіцца ў храме падчас Вялікага посту па серадах і пятніцах. Пасля набажэнства, якое доўжылася каля трох гадзін, епіскап Ігнацій падзякаваў усім вернікам за тое, што наведваюць храм, жывуць з Богам у сэрцы і душы. Цяпер, калі ў свеце існуе вялікае мноства пагроз, здараюцца катастрофы прыроднага і тэхнагеннага характару, успыхваюць лакальныя войны, вельмі важна памятаць, што духоўная еднасць людзей, іх вера ў Бога здольныя выратаваць чалавецтва.
Сяргей РАЙЧОНАК, фота аўтара.
