У памяшканні сельскага клуба вёскі Сталіца ААТ “Княж” адбылася сустрэча мясцовых жыхароў з выконваючай абавязкі галоўнага ветурача раёна Рамуальдай Эдуардаўнай Вайцяховіч і старшынёй Германавіцкага сельскага Савета Аленай Альбертаўнай Рубан. Людзям хацелася даведацца з, так скажам, першых вуснаў, што рабіць са свінямі, якія ўтрымліваюцца на падворку ў сувязі з распаўсюджваннем захворваннея на АЧС.
Спецыяліст ветэрынарнай службы паведаміла, што вірус захворвання вельмі хутка распаўсюджваецца. Сёння на тэрыторыі раёна няма ачагоў інфекцыі АЧС. Пад пільным кантролем сітуацыя на свінакомплексе ў КУВСП “Гарадзец”, на рынку. Тым не менш назваць становішча спакойным нельга. АЧС выяўлена ў васьмі раёнах вобласці. У сувязі з гэтым усё пагалоўе свіней на падворках падлягае забою. Атрыманую прадукцыю можна выкарыстоўваць для харчавання ў межах раёна, калі ж трэба вывезці за яго межы, неабходна мець дазвол ад ветэрынарнага ўрача вобласці. Устаноўлены тэрмін забою — да 1 снежня. Пасля гэтага будуць прымацца больш жорсткія меры.
Гэтае патрабаванне абавязковае для ўсіх, хто трымае на сваім падворку свіней, і яму трэба падпарадкоўвацца, каб у горшым выпадку не застацца ні з чым.
Затым былі пытанні з залы, на якія адказвала Рамуальда Эдуардаўна.
— Якія меры прадпрымаюцца ў адносінах да дзікіх кабаноў, якія з’яўляюцца галоўнымі пераносчыкамі хваробы?
— На тэрыторыі раёна налічвалася 298 галоў дзікіх кабаноў. Забіта з іх каля сотні. Спачатку дазвалялася паляванне толькі ноччу, цяпер, з 1 кастрычніка, можна і днём, але вельмі асцярожна, бо ў лясах шмат грыбнікоў.
— Якія патрабаванні прад’яўляюцца да тых, хто будзе трымаць свіней на падворку да 1 снежня?
— Трэба захаваць усе метады перасцярогі, пра якія не раз пісала раённая газета. І самае галоўнае, пры ўваходзе ў жывёлагадоўчае памяшканне павінна быць дэзпадушка. Ні ў якім разе жывёла не павінна быць у выгулах, а толькі ў закрытых хлявах.
— Аршанскі, Глыбоцкі мясакамбінаты прапаноўваюць тушонку са свініны, а, магчыма, і яна ад хворай жывёлы?
— З мясакамбінатаў паступае прадукцыя, якая прайшла праверку і тэрмаапрацоўку. Такую прадукцыю можна ўжываць у ежу.
— Ці можна ў зіму купіць парасят?
— Такога дазволу ніхто не дае. Калі што здарыцца, ніхто адказнасці не панясе, акрамя гаспадара.
— А хто кантралюе ўвесь гэты працэс?
— У раёне створаны штаб, у які ўваходзіць 15 чалавек.
— А калі мінуе нас гэта хвароба, дзе возьмем парасят для гадоўлі?
— Уся задача заключаецца ў тым, каб захаваць свінакомплекс. Будуць там парасяты, значыць будуць і ў насельніцтва.
АД РЭДАКЦЫІ: Чым можна замяніць мяса свіней? Гадуйце птушак. Ёсць жывы прыклад. Непадалёку ад вёскі Сталіца ў Каралеве гаспадар трымае вялікую ферму гусей. Не першы год ён іх разводзіць і прыйшоў да высновы, што лепшага мяса не знойдзеш і гадаваць такую птушку не складаней, чым свіней. Варта задумацца, прааналізаваць становішча і не кідацца ў паніку.
Падрыхтавала Кацярына СОСНА.
Фота Марыны ЖАКАЎКА.