У КУВСП імя Маркава запланавана правесці ворыва на плошчы 1250 гектараў. З гэтай задачай аграрыі справіліся на 104 працэнты.
Механізатар Вячаслаў Відун (на здымку) па стане на 31 кастрычніка запісаў на свой рахунак 1040 гектараў узараных плошчаў. Як паведамілі ў адміністрацыі сельгаспрадпрыемства, Вячаслаў — адзіны механізатар, задзейнічаны на ўзворванні, іншыя трактарысты працуюць на розных відах работ.
— Пасля службы ў арміі вырашыў застацца на малой радзіме, — кажа Вячаслаў. — Працаваў на трактарах розных марак і мадыфікацый. Сёмы год кірую энерганасычаным «Кіраўцам» К-744. Тэхніка надзейная, асаблівых нараканняў на работу вузлоў і механізмаў няма. Галоўнае, своечасова рамантаваць, тады «сталёвы конь» будзе працаваць бездакорна.
У дзень нашага наведвання Вячаслаў праводзіў узворванне на 44-гектарным полі паміх вёскамі Дуліна і Ружамполле. Наперадзе механізатара чакалі іншыя палеткі, дзе трэба правесці ўздым зябліва.
Сяргей РАЙЧОНАК, фота аўтара.