19 снежня 1979 года камісія Палітбюро ЦК КПСС па Афганістане прапанавала рашэнне аб аказанні ваеннай дапамогі гэтай паўднёвай краіне шляхам уводу на яе тэрыторыю войск.
40-я армія, узмоцненая верталётнымі часцямі і знішчальнікамі-бамбардзіроўшчыкамі ўвайшла ў Афганістан 25 снежня 1979 года.
Шмат беларускіх сем’яў закранула гэта неаб’яўленая вайна. 65 юнакоў Шаркаўшчынскага раёна выконвалі інтэрнацыянальны абавязак у Афганістане. Наш зямляк, падпалкоўнік Мікалай Андзілеўка загінуў у той страшнай вайне на чужыне.
Шаркаўшчынскія воіны-афганцы сабраліся на памятны мітынг у скверы ДРБУ № 131 каля помніка «Чорны цюльпан», каб у чарговы раз аддаць даніну павагі саслужыўцам, якія навечна засталіся на афганскай вайне, узгадаць імёны воінаў-інтэрнацыяналістаў, спаўна выканаўшых свой воінскі абавязак перад Радзімай. Нагодай таму стала памятная дата — 45-годдзе з моманту ўводу савецкіх войск у Афганістан.
Былым салдатам ёсць што ўспомніць, у думках вярнуцца ў тыя часы, калі па загадзе вайсковага камандавання яны верна служылі Айчыне. Самым маладым воінам-інтэрнацыяналістам ужо амаль па шэсцьдзясят гадоў, але яны і цяпер захоўваюць добрую фізічную форму і салдацкую выпраўку. Мужчыны ўсклалі чырвоныя гваздзікі да помніка, запалілі свечку і хвілінай маўчання ўшанавалі светлую памяць аб загінуўшых.
У актавай зале сярэдняй школы № 1 прайшло мерапрыемства пад назвай «Час выбраў нас», арганізаванае вучнямі і класным кіраўніком 9 «В» класа Юліяй Магаліцкай. Прысутных гасцей вітала дырэктар навучальнай установы, намеснік старшыні раённага аддзялення Беларускай партыі «Белая Русь» Ірына Рымдзёнак. Былыя воіны-афганцы дзяліліся ўспамінамі са школьнікамі пра час службы ў далёкай паўднёвай краіне. Ветэраны вайны расказвалі пра баявыя будні, горыч паражэнняў, страту верных таварышаў, пра ўзаемадапамогу і ўзаемавыручку, без якіх нельга было выжыць пад палаючым небам Афганістана.
— Мы на пастаяннай аснове праводзім сустрэчы з падрастаючым пакаленнем, расказваем падлеткам пра важнасць захавання міру, — падкрэсліў старшыня раённай арганізацыі ГА «Беларускі саюз ветэранаў вайны ў Афганістане» Васіль Протас. — Выхаванне патрыятызму, любові да сваёй Айчыны з’яўляюцца адным з асноўных накірункаў дзейнасці нашага грамадскага аб’яднання.
Сяргей РАЙЧОНАК, фота аўтара.