У Шаркаўшчынскім раённым цэнтры рамёстваў адкрылася выстава вязаных вырабаў Алены Якушавай “Вясна цяпла, любові і дабрыні”. Аўтарскія работы падзелены на некалькі тэматычных груп: “Цяпло матуліных рук”, “Згублена ў Беларусі”, “Наперад у мінулае”, “Дзіцячы свет” і іншыя.
Шаркаўчанка Алена Якушава прадэманствавала наведвальнікам сваёй выставы дзясяткі розных вырабаў, звязаных з дапамогай кручка: жаночыя сукенкі,вытанчаныя шалі, прыгожыя паланціны, дзіцячае адзенне, іншыя рэчы і ўпрыгожванні. Асобная часта выставы прысвечана матулі Алены Якушавай, якая нарадзілася 8 сакавіка.
Вязанне кручком і сёння застаецца адным з самых папулярных відаў творчасці. Такія вырабы не толькі прыгожыя і ўнікальныя, але і зручныя ў прымяненні, запатрабаваныя. Разнастайнасць прыёмаў вязання кручком, шырокі выбар арнаментальных і колеравых рашэнняў, нестандарнасць фасонаў і мадэляў дазваляюць ствараць вырабы, здольныя зацікавіць многіх.
Убачыць работы Алены Якушавай, а магчыма і набыць некаторыя з іх, можна ў раённым Цэнтры рамёстваў. Выстава “Вясна цяпла, любові і дабрыні” будзе адкрыта для наведвальнікаў на працягу месяца.
Вольга ЧАРНЯЎСКАЯ.
