Чыста, утульна, камфортна
У такіх умовах працуюць работнікі і ўтрымліваецца маладняк буйной рагатай жывёлы прафілакторыя малочнатаварнай фермы «Пялікі» ў адкрытым акцыянерным таварыстве «Даватарскі».
Аб’ект нядаўна здадзены ў эксплуатацыю. Яго ўзвядзеннем займаліся рабочыя будаўнічай брыгады сельгаспрадпрыемства, а размешчанае ў ім абсталяванне цалкам айчыннай вытворчасці. Гэта акалічнасць у значнай ступені паспрыяла зніжэнню кошту аб’екта.
У памяшканні ў кожнага цяляці асобная клетка, на подсціл выкарыстоўваецца салома, якая рэгулярна мяняецца. Працуюць дзве жанчыны-жывёлаводы: Аксана Кулакоўская і Надзея Арлова, якія пільна сочаць за сваімі гадаванцамі.
— Для аблягчэння працы выкарыстоўваецца малочнае таксі, — тлумачыць загадчыца МТФ Святлана Ісаева. — Яно прыстасавана для выпайкі цялят, дапамагае правільна прыгатаваць сумесь, каб у маленькіх гадаванцаў максімальна засвойваліся вітаміны і карысныя рэчывы. З першых дзён жыцця цялят кормім малозівам. Выпайку праводзім са спецыяльных кармушак, абсталяваных соскамі. Для кармлення выкарыстоўваем таксама камбікорм КР-1.
Як падкрэсліла жывёлавод Надзея Арлова, якая шмат гадоў занята ў гэтай сферы, у камфортных умовах праца прыносіць задавальненне. Галоўнае — якаснае, своечасовае кармленне і догляд за маладняком.
У ААТ «Даватарскі» на малочнатаварнай ферме «Валожынкі» ідзе рэканструкцыя аднаго з памяшканняў, якое ў хуткім часе будзе пераабсталявана пад прафілакторый для маленькіх цялят. Гэта, у сваю чаргу, паспрыяе захаванасці маладняку буйной рагатай жывёлы, а праз некаторы час і павелічэнню дойнага статка.
Сяргей РАЙЧОНАК, фота аўтара.
