Зусім нядаўна прагучаў апошні званок у навучальных установах раёна, а на мінулым тыдні, у чацвер, прайшлі выпускныя вечары. Развіталіся са школай, з дзяцінствам, з любімымі настаўнікамі і вучні Більдзюжскай сярэдняй школы.
У святочна ўбраную глядзельную залу мясцовага сельскага Дома культуры пад апладысменты прысутных па чарзе ўвайшлі адзінаццаць юнакоў і дзяўчат — выпускнікоў 2015 года. Пад гукі вальса яны павольна закружыліся ў чароўным танцы. Дырэктар навучальнай установы Ала Уладзіміраўна Якімчык уручаючы выпускнікам атэстаты сталасці, пажадала кожнаму з іх абраць сваю дарогу жыцця, каб ісці па ёй без перашкод, здзяйсняючы свае мары і жаданні. Павіншаваў адзінаццацікласнікаў, пажадаў ім далейшых поспехаў у самастойным жыцці кіраўнік раёна Мікалай Ірынархавіч Баговіч. На свяце сярод запрошаных гасцей прысутнічалі таксама начальнік аддзела адукацыі, спорту і турызму райвыканкама Мікалай Мікалаевіч Рубацкі, старшыня Більдзюжскага сельвыканкама Наталля Уладзіміраўна Драбовіч, намеснік дырэктара ААТ “Жвіранка” Анна Мар’янаўна Бездзель.
Святочнае мерапрыемства суправаджалася танцавальнымі нумарамі вучняў сярэдніх класаў. Вельмі прыемным і нечаканым сюрпрызам для настаўнікаў і для бацькоў выпускнікоў сталі кветкі, песні, словы вялікай удзячнасці за іх нялёгкую педагагічную працу і клопат. Наказ на далейшае дарослае, самастойнае жыццё выпускнікам ад імя бацькоў даў Уладзімір Фляр’янавіч Бучынскі.
Добрай традыцыяй у Більдзюжскай школе стала завязванне імянных стужак на ветразі “Карабля ведаў”. Імправізаваны атэстат, які ў далейшым будзе захоўвацца ў навучальнай установе, сваімі пісьмовымі пажаданнямі для адзінаццацакласнікаў запоўнілі настаўнікі, што крочылі разам з выпускнікамі на працягу ўсёй вучобы. Паклаўшы рукі на гэты “дакумент”, юнакі і дзяўчаты далі клятву ніколі не забываць сваіх педагогаў і як мага часцей наведваць родную школу.
“Алея зорак” навучальнай установы сёлета дапоўнілася яшчэ адной геаметрычнай фігурай з лічбай 2015. Менавіта яе напярэдадні выпускнога балю яркімі фарбамі на асфальце намалявалі адзінаццацікласнікі, як напамін аб слаўных, бесклапотных днях вучобы.
Вечаровае неба асвяціла зарыва святочнага салюта, які прагрымеў у гонар адзінаццаці юнакоў і дзяўчат, што пакінулі сцены роднай школы, каб упэўненым крокам пайсці ў далейшае самастойнае жыццё.
Сяргей РАЙЧОНАК.
