У жыцці сельскага жыхара складана знайсці падзею больш важную, чым заканчэнне жніва. Напрыканцы лета на дажынках у аграгарадку Більдзюгі падвялі вынікі ўборачнай кампаніі ў ААТ “Жвіранка”.
Святочны настрой падтрымала “нябесная канцылярыя”, якая быццам на заказ, падарыла па-сапраўднаму летняе цяпло. Прыўзняты настрой дапоўніла выступленне калектываў Більдзюжскага СДК і артыстаў з Каўшэлеўскага Дома фальклору. Музыкі шчодра падарылі ўдзельнікам свята вянок цудоўных музычных кампазіцый.
Падчас уборачнай кампаніі ў ААТ «Жвіранка» неабходна было ўбраць 1079 гектараў азімых культур, 319 гектараў ячменя і 111 гектараў аўса, а таксама 221 гектар зернебабовых культур.
Адказная праца была даверана вопытным камбайнерам, якія некалькі гадоў запар прымалі ўдзел у жніве: сярод іх малады механізатар Валянцін Яшчанка, які на камбайне КЗС-1218 убраў 427 га, намалаціў 1341 тону зерня, Пётр Бездзель на камбайне КЗС-1218 убраў 331 га, намалаціў 1108 тон зерня. Таксама плённа папрацавалі камбайнеры Раман Васюцёнак, Яўгеній Пятрашка, Сяргей Хрол, Сяргей Карпаў, Аляксандр Шаўлюга, Сяргей Курэц, Казімір Баркоўскі і іншыя. На адвозцы збожжа лідзіруючыя пазіцыі ў раёне займае Раман Яшчанка, які на аўтамабілі МАЗ-555 перавёз ад камбайнаў 1910 тон зерня. Перасягнулі тысячны рубеж і Міхаіл Мітчанкаў (на аўтамабілі МАЗ-555 перавёз ад камбайнаў 1117 тон зерня), Аляксандр Валеўка (на аўтамабілі МАЗ-555 перавёз ад камбайнаў 1073 тоны зерня). Унеслі свой уклад таксама Руслан Карпаў, Пётр Ляскоўскі, Сяргей Марушчак, Фама Маляўка, Васілій Калінка і іншыя.
Трэба сказаць, што сёлета агульны намалот склаў 6664 тоны зерневых культур, пры сярэдняй ураджайнасці звыш 34,5 цэнтнера з гектара.
Дырэктар сельгаспрадпрыемства ААТ «Жвіранка» Пётр Ананька ўручыў перадавікам граматы сельгаспрадпрыемства і грашовыя прэміі. Таксама выказаў шчырыя словы ўдзячнасці ўсім, хто сваёй штодзённай працай праслаўляў і праслаўляе родны край, хто ўносіць важкі ўклад у эканамічнае развіццё раёна: механізатарам, вадзіцелям, жывёлаводам, кіраўнікам, спецыялістам, ветэранам працы. Поспехаў, шчасця, упэўненасці ў заўтрашнім дні пажадаў ён удзельнікам урачыстасці.
Праграма “Дажынак” уключала не толькі ўрачыстую цырымонію ўзнагароджання лепшых, але і шматлікія выстаўкі, смачныя пачастункі, цікавую бяспройгрышную латарэю для дзетак, розныя гульні і забавы.
Сяргей ВЫСОЦКІ.
