Ранішняе надвор’е першага вераснёўскага дня было крыху пахмурным. З-за шэрых аблокаў ледзь-ледзь прабіваліся сонечныя праменьчыкі. Настала восень, якая пасля летніх канікул зноў паклікала вучняў у краіну ведаў.
На ўрачыстую лінейку, прысвечаную святу першага званка, у Гуркаўскую базавую школу прыйшлі 23 вучні, іх бацькі, родныя, сябры і знаёмыя. Сярод запрошаных гасцей былі старшыня раённага выканаўчага камітэта Мікалай Ірынархавіч Баговіч, начальнік аддзела адукацыі, спорту і турызму райвыканкама Мікалай Мікалаевіч Рубацкі, старшыня Германавіцкага сельскага Савета Алена Альбертаўна Рубін, удзельнікі народнага літаратурна-музычнага аб’яднання “Світанак” Кацярына Мар’янаўна Сосна і Міледзій Мікалаевіч Кукуць.
— Дарагія дзеці, — звярнулася да вучняў дырэктар навучальнай установы Людміла Рамуальдаўна Хаданёнак, — сёння для вас пачынаецца новы навучальны год. Мы, настаўнікі, вельмі хочам, каб вы на занятках праявілі сваю настойлівасць, уменні, працавітасць у авалоданні школьнымі прадметамі. На працягу ўсяго навучальнага года вас чакаюць цікавыя і пазнавальныя ўрокі, захапляльныя заняткі на любы густ.
Людміла Рамуальдаўна ўручыла граматы і дыпломы вучням, якія ў мінулым навучальным годзе ўдзельнічалі ў абласных і рэспубліканскіх творчых конкурсах і праектах.
Старшыня раённага выканаўчага камітэта Мікалай Ірынархавіч Баговіч, звяртаючыся да школьнікаў, пажадаў ім мэтанакіравана напаўняць свой багаж ведамі, каб у будучым стаць дастойнымі грамадзянамі нашай краіны. Кіраўнік раёна ўручыў першакласнікам Івану Шудзялю і Ульяне Пугач кнігі ад Прэзідэнта краіны А. Р. Лукашэнкі “Беларусь — наша Радзіма”, а школе падарыў спартыўныя прыналежнасці для заняткаў па фізічнай культуры.
Дырэктар школв Людміла Рамуальдаўна Хаданёнак у якасці падарунка ўручыла вучням пятага класа кнігі казак “Твае першыя фінансы”, якія спецыяльна да свята першага званка перадаў разлікова-касавы цэнтр № 4 г. п. Шаркаўшчына аддзялення ААТ “Белаграпрамбанк” у г. Глыбокае.
Ганаровае права даць першы званок прадаставілі вучню дзявятага класа Дзмітрыю Лагунёнку і першакласніцы Ульяне Пугач. Яго пераліўны гук запрасіў на школьныя заняткі ў новы навучальны год.
Сяргей РАЙЧОНАК.
