Сёлетняе восеньскае надвор’е, як нельга лепш спрыяе аграрыям раёна. Яно дазволіла ім своечасова ўбраць вырашчаны ўраджай, а зараз зрабіць пэўны задзел на будучую вясну — заняцца ачысткай зерня насення яравых культур, унесці і заараць калійныя ўдабрэнні і арганіку. Відавочна, што вясной застануцца ў выйгрышы тыя сельгаспрадпрыемствы, у якіх арганічныя ўгнаенні будуць унесены восенню. Па-першае, гэта адаб’ецца на тэмпах палявых работ, бо не будзе адчувацца дэфіцыту тэхнікі. Дастаткова будзе толькі правесці на такім полі перадпасяўную апрацоўку глебы і запускаць пасяўныя агрэгаты. Па-другое, усе бачылі, як выглядаюць палеткі пасля зімы, калі па пераўвільготненай глебе рухаецца трактар, разразаючы ў зямлі вялізныя каляіны. Працаваць механізатарам у такіх умовах надзвычай цяжка. Зразумела, бо як след правесці падрыхтоўку глебы на такім палетку намнога складаней, перарасхода паліва не пазбегнуць. А яшчэ веснавая арганіка — цудоўны расаднік для пустазелля, вынішчыць якое без хімічных прэпаратаў немагчыма. Вось калі арганічныя ўгнаенні ўнесены з восені і заараныя, вялікі эфект у барацьбе з пустазеллем дадуць механічныя аграпрыёмы, праведзеныя перад сяўбой. Яшчэ адной перавагай арганікі з’яўляецца тое, што яе прымяненне дазваляе кампенсаваць недахоп мініральных тукаў.
Такога ж прынцыпу прытрымліваюцца і ў ААТ “Ельня-Агра”, дзе мясцовыя аграрыі дбаюць пра ўраджай наступнага года. Тут на плошчы 276 гектараў унесены калій пад зябліва. Хуткімі тэмпамі ідзе развоз па палетках арганічных ўгнаенняў пад веснавую сяўбу.
Сяргей РАЙЧОНАК.