25 верасня ў ААТ “Даватарскі” завяршылі сеяць азімае жыта на зялёны корм. Асноўныя пасяўныя работы былі скончаны 19 верасня. У гэты ж дзень давялося пабываць на палетках гаспадаркі, дзе вяліся работы.
Галоўны аграном Дзмітрый Мікалаевіч Раманюта азнаёміў з ходам пасяўной:
— У нас было запланавана пасеяць 1.216 гектараў — заданне выканана. Пасеялі 1.033 га азімай пшаніцы, 70 га азімага трыцікале, 113 га азімага жыта. На гэту важную сельскагаспадарчую кампанію былі накіраваны ўсе сілы. На палетках шчыра працавалі механізатары — імкнуліся ў аптымальныя тэрміны завяршыць пасяўную.
Мы накіроўваемся на поле паблізу ад вёскі Казакі. Там працуюць дзве сеялкі і культыватар. І вось механізатары спыняюцца на невялікі перапынак. Карыстаючыся магчымасцю, пачынаем размову.
— Тут працуем першы дзень і, думаецца, апошні — да вечара работу скончым, — уводзіць у курс справы механізатар Валерый Яўгенавіч Ласоўскі. — Працую на трактары “Беларус — 3022” з сеялкай АПП-6.
На момант гутаркі Валерый пасеяў за дзень каля 16 га азімай пшаніцы. Усяго на рахунку вопытнага механізатара з працоўным стажам 27 гадоў падчас восеньскай пасяўной 350 гектараў.
Другі сезон працуе на трактары “Беларус-3022” Алег Віктаравіч
Палягошка. Усяго за рулём ён шчыруе 17 гадоў. Кіраўніцтвам характарызуецца, як выдатны спецыяліст. На полі каля вёскі Казакі Алег пасеяў 16 га. Падчас пасяўной засеяў 575 гектараў.
— Сёння першы дзень працую з культыватарамі, — расказвае Мікалай Аляксеевіч Дарашчонак. — Дагэтуль займаўся ўзворваннем. Заўтра зноў буду падчэпліваць абаротныя плугі.
Як высветлілася, Мікалай Аляксеевіч працуе на трактары на змену з сынам Мікалаем. За суткі ўдвух узворваюць каля 30 га — па 15 гектараў кожны, праўда, калі глеба добрая і тэхнічныя няспраўнасці не дакучаюць. На
сваім “Беларусу” Мікалай Аляксеевіч працуе другі год — тэхніка амаль новая. На гэтай пасяўной на яго рахунку 750 узараных гектараў.
У дадзеным матэрыяле названы прозвішчы толькі трох механізатараў. А на пасяўной былі задзейнічаны многія. І агульны поспех залежыў ад укладу кожнага спецыяліста. Усе працавалі добра, імкнучыся ў акрэсленыя тэрміны загарнуць зерне ў зямлю, каб у наступным годзе атрымаць выдатны ўраджай. Упэўнены, што з такімі кадрамі “Даватарскаму” па сілу многія задачы.
Аляксандр БАРЫЛА