4 лістапада, у пятніцу, у Шаркаўшчыне праводзілася масавая акцыя ў межах добраўпарадкавання гарадскога пасёлка — пасадка дрэў. Удзел у гэтай карыснай справе прымалі прадстаўнікі арганізацый райцэнтра, а
таксама школьнікі. У той дзень дрэўцы высаджваліся на трох аб’ектах: у скверы ПМК-68, які замацаваны за БРСМ, каля раённай паліклінікі, дзе закладваецца новы сквер, і каля кацельнай УКП ЖКГ, побач з новымі шматпавярховікамі па вуліцы М. Горкага.
На усіх аб’ектах было шматлюдна. У скверы ПМК-68 работы вяліся пад кіраўніцтвам старшыні раённага камітэта М. В. Морхата. Як заўважыў Мечыслаў Віктаравіч, дрэвы — гэта жыццё, гэта чыстае паветра, гэта прыгажосць населенага пункта. Кіраўнік раёна лічыць, што на ўездзе ў Шаркаўшчыну з Міёрскага накірунку павінен быць прыгожы сквер. Прастаўнікамі арганізацый і моладзі была пастаўлена задача пасадзіць дрэўцы. Пасля сквер будуць даглядаць члены БРСМ. Поўным ходам ішла работа каля раённай паліклінікі, дзе медыкі і прадстаўнікі іншых арганізацый пад кіраўніцтвам галоўнага ўрача УАЗ «Шаркаўшчынская ЦРБ» С. Т. Стомы займаліся пасадкай дрэўцаў.
Каля кацельнай планіроўкай тэрыторыі кіраваў намеснік старшыні райвыканкама па будаўніцтву і добраўпарадкаванню М. Г. Ясюкевіч.
Асноўнае, што ў гэты дзень было добрае, не па-восеньску цёплае і сонечнае надвор’е, якое спрыяла агульнаму працоўнаму настрою.
Вельмі важна, што тэрыторыя Шаркаўшчыны пабагацела на некалькі соцень дрэўцаў, якія вясною парадуюць маладой зелянінай.
Аляксандр БАРЫЛА