Ужо стала добрай традыцыяй маштабна і велічна святкаваць у ноч з 23 на 24 чэрвеня нараджэнне святога Яна Хрысціцеля ў аграгарадку Германавічы. Мерапрыемства заўсёды збірае шмат гледачоў, сярод якіх не толькі католікі, але і праваслаўныя вернікі.
У пачатку ксёндз Ян Пугачоў адслужыў святую імшу ў касцёле Перамянення Пана. У сваёй пропаведзі святар, звяртаючыся да прыхаджан, заклікаў любіць бліжніх сваіх, шанаваць і паважаць старэйшых людзей, часцей наведваць храм, каб жыць з Богам у душы. Парафіяне, у сваю чаргу, павіншавалі пробашча касцёла з імянінамі, уручылі падарункі, выказалі пажаданні моцнага здароўя і доўгіх год служэння на ніве духоўнасці.
Затым вернікі ўрачыстым шэсцем рушылі са святым агнём да галоўнай пляцоўкі, дзе праходзіла асноўная частка свята. Ксёндз запаліў вогнішча, памаліўся над ім. Звяртаючыся да прысутных, Ян Пугачоў павіншаваў усіх з цудоўным святам нараджэння святога Яна Хрысціцеля, пажадаў кожнаму добрага настрою і прыемнага адпачынку. Старшыня Германавіцкага сельвыканкама Алена Рубін падзякавала ксяндзу за сумесную арганізацыю мерапрыемства, павіншавала яго з імянінамі, прыпаднесла букет кветак і падарунак.
Вядучыя мерапрыемства запрасілі на сцэну дзяўчат, якія умеюць плясці вянкі з кветак. Ахвотніц знайшлося нямала. Менавіта яны сплеценыя ў вянок валошкі, рамонкі і іншыя краскі кінулі потым у рачную гладзь, папярэдне загадаўшы сваю самую запаветную мару.
Тэатралізаваную дзею па матывах мастацкай кінастужкі “Вяселле ў Малінаўцы” гледачам паказалі самадзейныя артысты Германавіцкага Цэнтра культуры і народных традыцый. Выканаўцы галоўных роляў весялілі прысутных, праводзілі з імі гумарыстычныя конкурсы і гульні. Тэатралізацыя чаргавалася з выкананнем песень, якія спявалі і дарослыя, і маленькія дзеці.
Хтосьці пільна глядзеў канцэртную праграму, іншыя разам з дзецьмі забаўляліся на разнастайных атракцыёнах, была таксама і магчымасць добра падсілкавацца на вольным паветры за столікамі, папярэдне набыўшы харчовыя тавары, кандытарскія прысмакі ў гандлёвых кропках, якія бойка працавалі ў той вечар у Германавічах. А некаторыя назіралі за полымем вялікага вогнішча, углядаліся ў яго з жаданнем спаўнення сваіх патаемных мар і жаданняў.
Сяргей РАЙЧОНАК.
