Каб адносіць сябе да ліку творчых асоб, зусім не абавязкова складаць вершы ці пісаць музыку. Дастаткова мець багатую фантазію, цярпенне, вытрымку і верыць, што ўсё задуманае здзейсніцца. І тады нават звычайная газетная папера ператворыцца ў вашых руках у арыгінальны мастацкі шэдэўр.
Бібліятэкар Верацееўскай бібліятэкі Ларыса Сцяпанаўна Мядзелец з нядаўняга часу зацікавілася і асвойвае тэхніку стварэння вырабаў са старых газет. Гэта называецца дэкаратыўна-прыкладная творчасць з газетнай саломкі. З першага погляду нават і не здагадаешся, з чаго зроблены займальныя фігуркі жывёл, кошыкі для прысмакаў ці яек, вазоны для кветак, дзівосная яблынька, маленькі ровар і іншыя вырабы. Усё гэта сплецена з газетнай паперы адмысловым чынам, а потым акуратна расфарбавана і старанна ўпрыгожана. Так стос старых газет у руках Ларысы Сцяпанаўны ператвараецца ў сапраўдны рукадзельны цуд.
У Верацееўскай бібліятэцы Ларыса Сцяпанаўна праводзіць майстар-класы па пляценні з газетных трубачак для ўсіх жадаючых. У творчасці дапамогу аказваюць супрацоўнікі Верацееўскага ЦКіА Алена Леанідаўна Цітовіч, Кацярына Арсеньеўна Кезік і Алеся Станіславаўна Кулінок, якія нарыхтоўваюць матэрыял, робяць некаторыя дэталі, самі ствараюць невялікія фігуркі жывёл. ——Вырабы з газетнай паперы глядзяцца не горш за сплеценыя з лазы, — кажа Ларыса Сцяпанаўна, — а галоўнае, пляценне з трубачак даступна і дарослым, і дзецям — трэба толькі нарыхтаваць як мага больш матэрыялу.
У час нашай размовы Ларыса Сцяпанаўна расказала пра тэхналагічныя асаблівасці падрыхтоўкі газетнай паперы да рукадзелля, пазнаёміла з прыёмамі выканання бумажных фрагментаў у тэхніцы пляцення.
—Асабліва гэты занятак захапіў дзяцей, — працягвае аповед Ларыса Сцяпанаўна, — паступова ўключаюцца ў работу, уносячы пасільны ўклад, наша самая маленькая рукадзельніца —чатырохгадовая Насця Кулінок, сямікласніца Паліна Цітовіч і іншыя дзеці. Ствараючы прыгожыя рэчы, юныя гурткоўцы навучаюцца цаніць працу, адкрываюць свет самавыяўлення.
Знаёмячыся з работамі Ларысы Сцяпанаўны і яе памочнікаў зноў і зноў пераконваешся, якая шматгранная, разнастайная і бязмежная творчасць. Зрабіць нешта прыгожае і цікавае можна з самых звыклых непрыкметных прадметаў. Трэба толькі спыніцца і прыгледзецца, каб у звыклым, непрыкметным знайсці дзівосныя і яркія моманты.
Таццяна ГУГАЛІНСКАЯ,
студэнтка філалагічнага факультэта ВДУ імя П. М. Машэрава
