7 жніўня ў Беларусі адзначаецца Дзень чыгуначніка

Актуальное

калектыў чыгуначнай станцыі Шаркаўшчызна
калектыў чыгуначнай станцыі Шаркаўшчызна

Вялікая колькасць жыхароў нашага раёна пры выбары найбольш аптымальнага транспарту аддае перавагу менавіта чыгуначнаму. Бо на сённяшні дзень гэта адзін з самых танных і надзейных відаў перавозак як пасажыраў, так і грузаў. І менавіта заўтра, як і кожны год, у першую нядзелю жніўня сваё прафесійнае свята —Дзень чыгуначніка — будуць адзначаць работнікі стальных магістраляў.

Віцебскае аддзяленне Беларускай чыгункі станоўча ацэньвае дзейнасць калектыву чыгуначнай станцыі Шаркаўшчызна, а начальнік станцыі Віктар Аляксандравіч Лабуць у гэтым годзе ўзнагароджаны нагрудным знакам “Выдатнік беларускай чыгункі”. Зладжаны калектыў, які на працягу многіх гадоў узначальвае Віктар Аляксандравіч, працуе стабільна і забяспечвае выкананне большасці даведзеных заданняў.

— Пры выкананні паказчыкаў вялікі вопыт работы, безумоўна, дапамагае, але галоўнае — гэта падтрымка калег, — адзначыў  начальнік станцыі Шаркаўшчызна В. А. Лабуць. — І атрыманая ўзнагарода — рэзультат нашай агульнай працы. Сумленна і аператыўна выконваюць сваю работу дзяжурныя Яўген Іванавіч Лабуць, Алег Уладзіміравіч Васільеў, Ірына Уладзіміраўна Максімава. Менавіта ад прафесійных дзеянняў гэтых людзей залежыць выкананне такіх заданняў, як пагрузка і прастой вагонаў пры ажыццяўленні грузавых аперацый, забеспячэнне графіка прыбыцця і адпраўлення цягнікоў, бяспека руху і выкананне патрабаванняў аховы працы. Належным чынам свае абавязкі выконвае спецыяліст таварнай канторы Юлія Яўгенаўна Бабчонак. За надзейнасць апаратуры на станцыі нясе адказнасць механік дыстанцыі сігналізацыі і сувязі Павел Раманавіч Палялейка. Паспяхова арганізавана работа прафсаюзнай арганізацыі, якую узначальвае Ірына Уладзіміраўна Максімава. Увечары, асабліва ў цёплую пару года, людзі з задавальненнем чакаюць пасажырскі цягнік на тэрыторыі станцыі, дзе заўсёды адчуваецца клапатлівая рука станцыйнай рабочай Наталлі Чаславаўны Буйка. На прыгожых клумбах — вялікая колькасць кветак і дэкаратыўных раслін, кусты і трава акуратна падстрыжаны, дарожкі і платформа падмецены. Чысціня і парадак на прылеглай да чыгункі тэрыторыі — вынік добрасумленнай працы Наталлі Чаславаўны.

работнікі Варапаеўскай дыстанцыі пуці забяспечваюць спраўны стан чыгуначнага палатна
работнікі Варапаеўскай дыстанцыі пуці забяспечваюць спраўны стан чыгуначнага палатна

А ўвогуле, эфектыўную работу чыгуначнікаў на станцыі Шаркаўшчызна забяспечваюць некалькі асобных службаў. Па першае, гэта аддзел перавозак, які кантралюе бяспеку руху на чыгунцы і забяспечвае дастаўку пасажыраў і грузаў.  Варапаеўская дыстанцыя пуці на чале з дарожным майстрам Іванам Часлававічам Васілеўскім адказвае за спраўны стан чыгуначнага палатна. Структурнае падраздзяленне “Віцебскгрузсервіс”, якое ўзначальвае Юрый Віктаравіч Грэцкі, ажыццяўляе арганізацыю пагрузачных работ на станцыі, а Полацкая дыстанцыя сігналізацыі і сувязі адказвае за спраўнасць і надзейнасць апаратуры.

Немагчыма падлічыць, колькі цягнікоў за сваю працоўную дзейнасць сустрэлі і адправілі ў далейшы шлях нашы ветэраны, якія ў розныя гады працавалі на чыгуначнай станцыі Шаркаўшчызна. У іх ліку Міхаіл Рыгоравіч Ліпскі, Тамара Ювінальеўна Кобелева, Галіна Міхайлаўна Максімава, Таццяна Нікіфараўна Болт, Часлаў Часлававіч Трашчынскі і Галіна Казіміраўна Канстанцінава. Усе гэтыя людзі заслугоўваюць шчырых слоў удзячнасці за сваю шматгадовую добрасумленную працу. Шчыра віншую ўсіх сваіх калег-чыгуначнікаў з прафесійным святам і жадаю ім моцнага здароўя, дабрабыту і поспехаў ва ўсіх справах!

З 1933 года, у якім у Шаркаўшчыне з’явілася свая чыгуначная станцыя, прайшло нямала гадоў і, безумоўна, работа чыгуначнікаў за гэты вялікі адрэзак часу вельмі змянілася і стала зусім іншай. Але па-ранейшаму, як і шмат гадоў таму, у наш гарадскі пасёлак  працягваюць прыбываць цягнікі. За вокнамі вагонаў мільгаюць твары пасажыраў, міма праплываюць шматлікія лёсы людзей, і з гэтым бясконцым рухам неразрыўна звязана невялікая станцыя Шаркаўшчызна, работнікі якой шчыра жадаюць усім сваім пасажырам “шчаслівай дарогі!”.

Вольга ЧАРНЯЎСКАЯ



Добавить комментарий

Ваш e-mail не будет опубликован. Обязательные поля помечены *