Лукашэнка строга раскрытыкаваў прэтэнзіі Данкверта да беларускіх прадуктаў харчавання
Прэзідэнт Беларусі Аляксандр Лукашэнка строга раскрытыкаваў прэтэнзіі кіраўніка Рассельгаснагляду Сяргея Данкверта да беларускіх прадуктаў харчавання. Адпаведную заяву кіраўнік дзяржавы зрабіў 9 снежня на нарадзе па праекце дагавора аб Мытным кодэксе ЕАЭС.
«У нас, калі нават усё будзе нармальна, такія дзеячы, як Данкверт і іншыя, аплююць, абылгуць і абгадзяць, як гэта было нядаўна. Аказваецца, у яго кавалак мяса з Беларусі, або стакан малака, або кавалак хлеба засядае, прадукцыя не тая. І ўрад пры гэтым маўчыць», — сказаў Прэзідэнт.
Аляксандр Лукашэнка адзначыў, што ў плане мытных працэдур і мытнага працэсу Беларусь «прастрэльваецца» з усіх бакоў. «У нас відаць усё, нічога не схаваеш. У нас нават бяспошлінна аўтамабіль не завязеш. Гэта будзе вядома», — сказаў ён.
Адначасова Прэзідэнт канстатаваў, што, напрыклад, Казахстан і Расія маюць вялікія тэрыторыі і працяглыя граніцы, дзе часам цяжка пракантраляваць усе працэсы.
Гаворачы аб Мытным кодэксе, кіраўнік дзяржавы падкрэсліў, што пры яго прыняцці ўсё павінна быць улічана. «Мы нічога не павінны страціць. У нас страчваць няма чаго. Калі асноўныя ігракі нашага эканамічнага саюза — Расія і Казахстан — могуць дзесьці на штосьці закрыць вочы і рукой махнуць (у іх грошай шмат, ведаеце ад чаго), то ў нас такіх шалёных грошай няма. Мы зарабляем сваімі мазгамі і рукамі гэтыя грошы», — дадаў Аляксандр Лукашэнка.
ЕЭК: дзеянні Рассельгаснагляду адносна беларускіх прадуктаў харчавання не адпавядаюць устаноўленым патрабаванням
Еўразійская эканамічная камісія па просьбе БЕЛТА выказала сваю пазіцыю па пытаннях адпаведнасці беларускіх прадуктаў ветэрынарна-санітарным патрабаванням Расіі, якасці такой прадукцыі, а таксама рээкспарту так званых санкцыйных прадуктаў харчавання.
— Цяпер Федэральная служба па ветэрынарным і фітасанітарным наглядзе Расіі пры выяўленні перамяшчэння тавараў з тэрыторыі Беларусі на тэрыторыю РФ з парушэннем ветэрынарна-санітарных патрабаванняў (неадпаведнасць сертыфікатаў, неадпаведнасць масавай долі бялку і г.д.) уводзіць часовыя абмежаванні на пастаўкі падкантрольных тавараў з беларускіх прадпрыемстваў. Наколькі гэта правамерна?
Каменціруе дырэктар дэпартамента санітарных, фітасанітарных і ветэрынарных мер ЕЭК Ігар Гаеўскі:
— На нашу думку, дзеянні Федэральнай службы па ветэрынарным і фітасанітарным наглядзе не адпавядаюць устаноўленым патрабаванням у актах ЕЭК. У адпаведнасці з палажэннем аб адзіным парадку ажыццяўлення ветэрынарнага кантролю на мытнай граніцы ЕАЭС і на мытнай тэрыторыі саюза яго патрабаванні прымяняюцца ў дачыненні да тавараў, пазначаных у адзіным пераліку тавараў, што падлягаюць ветэрынарнаму нагляду.
У прыватнасці, палажэнне ўстанаўлівае парадак правядзення кантролю дзяржаўнымі органамі і ўстановамі дзяржаў ЕАЭС, якія ажыццяўляюць дзейнасць у галіне ветэрынарыі, за падкантрольнымі таварамі на мытнай граніцы і мытнай тэрыторыі саюза для недапушчэння ўвозу і перамяшчэння небяспечных для здароўя чалавека і жывёл падкантрольных тавараў.
Пры гэтым у адзіным пераліку тавараў, што падлягаюць ветэрынарнаму нагляду, устаноўлены асобныя катэгорыі прадукцыі жывёльнага паходжання, якія падлягаюць кантролю ў частцы эпізаатычнай стабільнасці без правядзення лабараторных даследаванняў на адпаведнасць патрабаванням саюза. Інакш кажучы размова ідзе пра стабільнасць ветэрынарна-санітарнай абстаноўкі на тэрыторыі, з якой выходзіць груз. Патрабаванне ў пераліку ўказана толькі па гэтым крытэрыі, лабараторныя выпрабаванні не патрэбны.
— Ці сапраўды беларускі бок злоўжывае тым, што Расія адмовілася ад тавараў з шэрага еўрапейскіх краін, ЗША? Якога меркавання прытрымліваецца ЕЭК у пытаннях рээкспарту? Ці правамоцныя заявы Рассельгаснагляду аб нядобрасумленнасці беларускіх прадпрыемстваў?
Дырэктар дэпартамента аграпрамысловай палітыкі ЕЭК Станіслаў Бубен:
— У Беларусь паступаюць тавары з трэціх краін, у тым ліку ўключаныя ў санкцыйны расійскі спіс. Калі тавар, які паступіў у рэспубліку, прайшоў перапрацоўку (ачыстка, засолка, тэрмічная апрацоўка і гэтак далек) і маркіруецца вытворцам Беларусі, то гэты тавар з’яўляецца беларускім і ў перапрацаваным выглядзе можа свабодна выкарыстоўвацца ва ўнутраным гандлі на рынку саюза, напрыклад перапрацаваныя крэветкі, рыба.
Упэўнены, каб вызначыць у выпадках, калі ўзнікае сумненне, краіну паходжання тавару, неабходна праводзіць дэталёвую праверку па кожнай канкрэтнай сітуацыі. І толькі на падставе рэзультатаў рабіць нейкія вывады.
Выклікае сумненне абгрунтаванасць заяў Рассельгаснагляду аб немагчымасці беларускіх прадпрыемстваў выпускаць малочную прадукцыю з нармальнай колькасцю бялкоў у саставе, пэўнай тлустасці.
— На чым заснаваны заявы Рассельгаснагляду аб неадпаведнасці беларускай малочнай прадукцыі ў частцы выкарыстання сухога малака?
Ігар Гаеўскі:
— У адпаведнасці з дагаворам аб ЕАЭС для прымянення і выканання тэхнічных рэгламентаў выкарыстоўваюцца стандарты з пералікаў да рэгламентаў або атэставаныя на дзяржаўным узроўні методыкі. Пры кантролі беларускага малака Рассельгаснагляд прымяняў методыку вымярэння масавай канцэнтрацыі сухога малака ў пробах прадуктаў харчавання метадам імунаферментнага аналізу з дапамогай набору рэагентаў «Сухое малако-ІФА» вытворчасці ТАА «ХЕМА», распрацоўшчык ТАА «ХЕМА». Аднак гэта методыка не толькі не ўключана ў пералік стандартаў, што змяшчаюць правілы і метады даследаванняў (выпрабаванняў) і вымярэнняў, у тым ліку правілы адбору ўзораў, неабходныя для прымянення і выканання патрабаванняў тэхнічнага рэгламенту Мытнага саюза «Аб бяспецы малака і малочнай прадукцыі» (ТР МС 033/2013), зацверджаны рашэннем Калегіі ЕЭК 26 мая 2014 года, але і не ўнесена ў Федэральны інфармацыйны фонд Расійскай Федэрацыі па забеспячэнні адзінства вымярэнняў і не можа быць выкарыстана нават на тэрыторыі Расіі для наглядна-кантрольнай функцыі.
Акрамя таго, навуковая канцэпцыя метаду імунаферментнага аналізу ІФА, на якім заснавана гэта методыка, прадугледжвае выяўленне змененых структур бялку малака, якое прайшло сушку, што можа супадаць са структурай бялку малака, якое прайшло высокатэмпературную апрацоўку, і прывесці да атрымання памылковастаноўчых рэзультатаў выяўлення сухога малака ў пітным.
Выкарыстанне гэтай методыкі для прымянення і выканання патрабаванняў тэхнічных рэгламентаў саюза і ажыццяўлення кантрольна-наглядных мерапрыемстваў неправамерна.
Прадастаўленне ў сродках масавай інфармацыі рэзультатаў прымянення методыкі, якія могуць быць у тым ліку памылковастаноўчымі, садзейнічае ўвядзенню ў зман спажыўцоў і адмоўна ўплывае на рэпутацыю добрасумленных вытворцаў.
«Рассельгаснагляд» прад’яўляе да беларускай прадукцыі неабгрунтавана завышаныя патрабаванні — Мінсельгасхарч
Аб гэтым заявіў намеснік міністра сельскай гаспадаркі і харчавання Беларусі Ігар Брыло.
Паводле слоў Ігара Брыло, прэтэнзіі «Рассельгаснагляду» да беларускіх прадпрыемстваў адносна якасці неабгрунтаваныя, аб прадузятасці расійскага ведамства сведчыць і адказ Еўразійскай эканамічнай камісіі.
«Мы гатовы весці дыялог па любой неадпаведнасці, калі яна на самай справе існуе», — адзначыў ён, дадаўшы, што кожны выпадак аналізуецца, праводзіцца маніторынг усяго вытворчага ланцужка на заводзе, да якога былі пытанні.
Намеснік міністра падкрэсліў, што часта сустракаюцца факты падробак беларускіх прадуктаў харчавання. Так, выяўлена 12 выпадкаў фальсіфікацыі прадукцыі Шчучынскага масласырзавода. У выніку закрываецца доступ на расійскі рынак прадпрыемствам, якія не маюць дачынення да выяўленых парушэнняў.
«Мы адправілі некалькі матэрыялаў па кожным факце. Расследаванні пацвярджаюць, што такая прадукцыя на тэрыторыі Беларусі не выпускалася», — паведаміў Ігар Брыло.
Першы намеснік дырэктара Дэпартамента ветэрынарнага і харчовага нагляду Мінсельгасхарча Аляксандр Куцко праінфармаваў, што склалася негатыўная практыка, калі на граніцы Расійскай Федэрацыі і Беларусі ўведзены пункты папярэдняга паведамлення, дзе з боку «Рассельгаснагляду» адносна беларускай прадукцыі ажыццяўляецца татальны кантроль. «Практычна кожная машына адкрываецца, ажыццяўляецца надгляд, ёсць выпадкі выгрузкі тавараў на вуліцу, адбіраюцца пробы для далейшых лабараторных даследаванняў. Гэтыя дзеянні супярэчаць нормам, закладзеным у дагаворы аб стварэнні Еўразійскага эканамічнага саюза. Сітуацыя не вырашаецца, а ў адносінах да беларускіх вытворцаў выстаўляюцца ўсё новыя патрабаванні і прэтэнзіі», — адзначыў Аляксандр Куцко.
Мінсельгасхарч: ні ў адной з 58 краін — спажыўцоў беларускай прадукцыі, акрамя Расіі, няма прэтэнзій да якасці
Аб гэтым заявіў журналістам намеснік міністра сельскай гаспадаркі і харчавання Беларусі Ігар Брыло.
«Арганізацыі Мінсельгасхарча пастаўляюць прадукцыю ў 58 краін свету. Акрамя Расіі, няма ніводнай прэтэнзіі па якасці нашай прадукцыі», — падкрэсліў Ігар Брыло. Пры гэтым ён заўважыў, што геаграфія паставак беларускіх прадуктаў харчавання штогод павялічваецца. «Гэта ЗША, Паўднёвая Амерыка, Афрыканскі, Азіяцкі кантыненты, краіны постсавецкай прасторы. Сертыфікавана 17 малакаперапрацоўчых прадпрыемстваў для арганізацыі паставак у Кітай, да канца года павінны прайсці гэту працэдуру мясаперапрацоўчыя прадпрыемствы», — сказаў намеснік міністра.
Ён звярнуў асаблівую ўвагу, што ў Беларусі патрабаванні да якасці прадукцыі значна вышэйшыя ў параўнанні з іншымі краінамі. Так, у мінулым годзе ўнесены змяненні ў стандарт 1598 2006 года «Малако каровіна, патрабаванні да закупак». Калі раней мелася на ўвазе наяўнасць мікраарганізмаў у 1 мл малака ў колькасці 4 млн, то з мінулага года гэты парог зніжаны да 500 тыс. Напрыклад, у Мытным саюзе верхняя мяжа складае 750 тыс. мікраарганізмаў у 1 мл малака. «Па колькасці саматычных клетак раней беларускі стандарт прадугледжваў паказчык у памеры 1 млн, цяпер ён зніжаны да 500 тыс. Для параўнання: Расія пакінула ў сябе 2-і гатунак малака і прымае малако з паказчыкам у памеры 4 млн мікраарганізмаў. Дарэчы, у Беларусі з мінулага года 2-га гатунку малака не існуе», — заўважыў Ігар Брыло. У працяг тэмы ён паведаміў, што гатунак экстра беларускага малака прымаецца з наяўнасцю да 300 тыс. саматычных клетак, у Еўропе аналагічны паказчык — 400 тыс.
«Гэта значыць абсалютна па ўсіх паказчыках беларускае патрабаванне да якасці прадукцыі значна вышэйшае», — падкрэсліў ён.
Больш таго, штогод павялічваюцца аб’ёмы пастаўкі малакаперапрацоўчым прадпрыемствам малака гатунку экстра. Калі 6-7 гадоў таму на беларускія перапрацоўчыя прадпрыемствы прымалася толькі амаль 2 працэнты малака гатунку экстра, то ў бягучым годзе ўжо — 43,2 працэнта.
Пракаменціраваў Ігар Брыло і сітуацыю з закрыццём расійскім бокам паставак шэрага беларускіх прадпрыемстваў, у прыватнасці 11 малакаперапрацоўчых. «З малакаперапрацоўчых ніводнае не закрыта па прычыне якасці і бяспекі. Інакш кажучы, у малаку не знойдзена таксічных элементаў, пестыцыдаў, антыбіётыкаў і інш. Яны закрыты па прычыне фальсіфікацыі прадукцыі пад беларускую, па прычыне нейкага няправільнага афармлення дэкларацый або выпіскі суправаджальных ветэрынарна-санітарных дакументаў», — сказаў намеснік міністра.
Беларусь мае шматступеньчатую сістэму кантролю якасці малака. На кожным жывёлагадоўчым аб’екце ёсць міні-лабараторыя, якая да пагрузкі ў малакавоз правярае якасць малака. Забор проб бярэцца і пасля прыезду малакавозаў на прадпрыемства. Ажыццяўляецца лабараторны кантроль усёй выпускаемай прадукцыі. Акрамя вытворчага існуе дзяржаўны ветэрынарны кантроль. «Толькі на дзяржаўны ветэрынарны кантроль у бягучым годзе затрачана Br3,5-4 млрд недэнамінаваных.Такім чынам, гаварыць аб тым, што ў Беларусі не існуе лабараторнага кантролю, некарэктна і непрафесіянальна», — рэзюмаваў Ігар Брыло.
Беларусь поўнасцю падтрымлівае новыя методыкі вызначэння якасці прадуктаў — Мінсельгасхарч
Намеснік міністра адзначыў, што ўсё ў свеце змяняецца, удасканальваецца, у тым ліку і метады ацэнкі якасці той ці іншай прадукцыі. Беларусь таксама гатова да ўвядзення новых методык кантролю якасці малака, але, падкрэсліў Ігар Брыло, гэтыя новаўвядзенні павінны ўводзіцца цывілізавана, а не так, як уводзіць Расійская Федэрацыя.
На сённяшні дзень тая методыка, па якой Рассельгаснагляд шукае сляды сухога малака ў беларускім малаку, не ўзаконена, яе няма ў пераліку стандартаў тэхнічнага рэгламенту Мытнага саюза. Акрамя таго, распрацоўшчыку гэтай методыкі Расстандарт прапанаваў правесці навукова-тэхнічны эксперымент і міжлабараторныя звяральныя даследаванні для таго, каб яе ўзаконіць. Беларускі бок прапанаваў гэтаму расійскаму распрацоўшчыку сумесна правесці такія дзеянні на базе нашага Інстытута мяса-малочнай прамысловасці. Адказу пакуль няма, але ўсё роўна прадаўжаюцца прэтэнзіі па наяўнасці сухога малака.
Ігар Брыло падкрэсліў, што Беларусь мае дакладны адказ Еўразійскай эканамічнай камісіі, якая праінфармавала Рассельгаснагляд аб яго неправамоцных дзеяннях.
Мінсельгасхарч: выяўляемыя неадпаведнасці ў беларускай прадукцыі — вынік банальных парушэнняў «Рассельгаснагляду» пры адборы проб
Аб гэтым заявіў начальнік галоўнага ўпраўлення знешнеэканамічнай дзейнасці Мінсельгасхарча Аляксей Багданаў.
Субяседнік растлумачыў, што перыяд часу ад адбору проб прадукцыі да правядзення даследавання рэгламентаваны адпаведнымі нарматывамі, якія «Рассельгаснагляд» ігнаруе. «Мы па пратаколах «Рассельгаснагляду» бачым, што ад адбору проб да дастаўкі іх у лабараторыі праходзіць ад 3 да 11 дзён. Хоць дастаўцы проб мяса ахалоджанай курыцы да лабараторыі, напрыклад, павінна адводзіцца 6 гадзін. А ў цэлым тэрмін годнасці для рэалізацыі ахалоджанага мяса птушак складае 5 сутак. Таму пры такіх парушэннях ва ўжо сапсаваных спецыялістамі «Рассельгаснагляду» пробах можна не толькі лістэрыю знайсці, але і ўсё, што хочаце», — абурыўся прадстаўнік Мінсельгасхарча.
Ён нагадаў, што заканадаўствам ЕАЭС прадугледжваецца правядзенне адбору проб на прадпрыемствах-вытворцах або ў пункце выгрузкі тавару. «Але ні ў якім разе не пры перавозцы або ў пунктах продажу тавараў. Таму што ў такіх выпадках вытворца адказнасці за тавар не нясе — ён не інфармаваны аб умовах перавозкі, захоўвання прадуктаў», — сказаў Аляксей Багданаў. У сувязі з гэтым начальнік галоўнага ўпраўлення знешнеэканамічнай дзейнасці Мінсельгасхарча асабліва падкрэсліў, што менавіта парушэнні рэгламентаў пры працэдурах адбору проб беларускай прадукцыі, захоўвання і транспарціроўкі проб прадстаўнікамі «Рассельгаснагляду» прыводзяць да таго, што яны і знаходзяць у беларускіх прадуктах якія-небудзь неадпаведнасці.
Прадстаўнік Мінсельгасхарча пракаменціраваў сітуацыю з закрыццём некаторых беларускіх прадпрыемстваў. Прычына таго — падробкі беларускай прадукцыі на расійскім рынку. «На расійскім рынку вельмі шмат парушэнняў з пункту гледжання фальсіфікату. Напрыклад, у рэгіёнах Расіі на складзе або паліцы магазіна бярэцца проба прадукцыі аднаго з беларускіх малочных заводаў. Выяўляецца нібыта неадпаведнасць па тлушчавым або бялковым балансе, па іншых параметрах. Потым выстаўляецца прэтэнзія з боку Расіі, і беларускае прадпрыемства закрываецца. Пры правядзенні разбораў аказваецца, што прадукцыя — фальсіфікат: выраблена ў Расіі на падпольным заводзе пад маркай «Зроблена ў Беларусі». Абсалютна невінаватае беларускае прадпрыемства закрываецца «Рассельгаснаглядам». Пры чым тут Беларусь, наогул незразумела!» — заўважыў Аляксей Багданаў, назваўшы пазіцыю «Рассельгаснагляду» прадузятай у адносінах да беларускіх прадуктаў харчавання.
Пры гэтым ён падкрэсліў: «Мы не супраць кантролю, але давайце гэта рабіць у рамках рэгламентаў і законаў, якія мы разам прымалі на агульнай пляцоўцы ЕАЭС».
У цэлым адносна аб’ёму экспарту прадукцыі арганізацый Мінсельгасхарча начальнік галоўнага ўпраўлення знешнеэканамічнай дзейнасці ведамства інфармаваў, што за 10 месяцаў бягучага года ён склаў $1 млрд 866 млн — 98,5 працэнта да ўзроўню аналагічнага перыяду мінулага года. Пры гэтым у агульным аб’ёме экспарту на долю паставак у Расію прыпадае 94 працэнты. У студзені-кастрычніку ў расійскія рэгіёны адгружана прадукцыі на суму $1 млрд 764 млн (98,9 працэнта да ўзроўню студзеня-кастрычніка 2015-га). Экспарт мяса птушкі ў натуральным выражэнні ў студзені-кастрычніку павялічыўся на 7,6 працэнта, каўбасных вырабаў — на 65 працэнтаў, вырабаў з мяса — на 26 працэнтаў, сыроў і тварагу — на 16,2 працэнта, сухой сыроваткі і канцэнтратаў — на 11 працэнтаў, мукі — у 4 разы. «Паводле прагнозаў, тэмп росту аб’ёму экспарту па выніках года складзе не менш як 100 працэнтаў да ўзроўню мінулага года», — адзначыў субяседнік, удакладніўшы пры гэтым, што, нягледзячы на высокі рост аб’ёмаў паставак у натуральным выражэнні, адзначаецца нізкі ўзровень цэн да ўзроўню мінулага года.
Аляксей Багданаў таксама сказаў, што Мінсельгасхарч актыўна працуе над дыверсіфікацыяй беларускага экспарту: так у студзені-кастрычніку бягучага года арганізацыі ведамства пастаўлялі прадукцыю на рынкі 58 краін свету супраць 51 краіны ў аналагічным мінулагоднім перыядзе.
Прырода харчовых войнаў Расіі з Беларуссю мае эканамічны характар — расійскі эксперт
Аб гэтым заявіў доктар палітычных навук, кандыдат эканамічных навук, прафесар Дыпламатычнай акадэміі МЗС РФ Аляксей Бінецкі.
«Прырода гэтых праблем, безумоўна, не палітычная, а эканамічная, паколькі мы ведаем, што расійскія вытворцы гадоў 10-12 таму спрабавалі актыўна, у тым ліку і рэйдарскім шляхам, захапіць беларускія прадпрыемствы, якія вырабляюць высакаякасную харчовую прадукцыю. Гэта не атрымалася. Механізмы ўздзеяння на беларускіх вытворцаў былі прыкладна тыя ж, з выкарыстаннем вось гэтага лабісцкага палітычнага механізма», — сказаў Аляксей Бінецкі.
Эксперт падкрэсліў, што ў Расіі вялікая колькасць беларускіх прадуктаў падробліваецца. «Я звярнуў увагу, што на беларускае масла час ад часу мяняецца ўпакоўка. Гэта значыць, калі такое адбываецца, то, хтосьці з беларускіх вытворцаў не проста адгружае прадукцыю, але і думае пра будучае, пра гандлёвую марку, пра тое, каб тыя, хто купляе беларускія тавары і хто хоча купляць (а такая колькасць людзей вельмі вялікая), былі ўпэўнены, што не купляюць падробку», — заўважыў ён.
Сурыкаў пра беларускія прадукты харчавання: якасныя і добрыя
Беларускія прадукты харчавання вызначаюцца якасцю, заявіў Надзвычайны і Паўнамоцны Пасол Расіі ў Беларусі Аляксандр Сурыкаў.
«Усім падабаюцца беларускія прадукты харчавання. Мне яны таксама падабаюцца — якасныя, добрыя прадукты харчавання. Але чаму яны падабаюцца? Таму што існуюць кантралюючыя структуры», — сказаў Аляксандр Сурыкаў і дадаў, што такія структуры не дапускаюць пападання няякаснай прадукцыі да пакупніка.
Пры гэтым Аляксандр Сурыкаў лічыць, што ў харчовых пытаннях паміж Беларуссю і Расіяй важна адкідаць эмоцыі, неабходна разглядаць сутнасць пытання. «А палітызацыю і эмацыянальнасць трэба пакінуць за кадрам. Вядома, мы пастараемся таксама, каб гэта справа менш палітызавалася і менш эмоцыі выліваць у СМІ. Але галоўнае — у сутнасці. У якасці прадукцыі і падтрыманні яе аўтарытэту на расійскім рынку, а таксама расійскай прадукцыі на беларускім рынку, нарошчванні аб’ёмаў уласных прадуктаў харчавання», — сказаў пасол.
«Мы лічым, то эмацыянальнасць прысутнічае сёння, трэба яе прыглушыць. Кантралюючыя службы — і расійскія, і беларускія — павінны працаваць сінхронна, з разуменнем, спыняючы тэхналагічна няправільныя працэсы», — адзначыў Аляксандр Сурыкаў. Паводле яго слоў, добра было б аб’яднаць гэтыя службы ў адну на ўзроўні Саюзнай дзяржавы. «І каб гэта агульная служба працавала на карысць пакупніка — і беларускага, і расійскага. На карысць вытворцы, росту прадукцыйнасці і ў Беларусі, і ў Расіі. Гэта было б лепш за ўсё», — рэзюмаваў ён.
Меркаванне:
Мікалай Шарстнёў, старшыня Віцебскага аблвыканкама:
«Гаварыць пра сумніўную якасць нашых прадуктаў проста неэтычна. Дзейнічаюць лабараторыі, якія вядуць кантроль і сыравіны, і гатовай прадукцыі. Відавочна, што наша прадукцыя перашкаджае, таму што яна канкурэнтаздольная і карыстаецца попытам. На фоне існуючай перавытворчасці ідзе барацьба за рынак. Наколькі яна сумленная і чыстая — гэта ўжо меркаваць спажыўцу, які часта ў гэтай барацьбе і церпіць».
«Трэба не проста рэалізаваць прадукцыю, а прадаць яе па добрых цэнах, каб атрымаць максімальны прыбытак. Інакш страчваецца сэнс вытворчасці. Прэзідэнт выразна паставіў задачу — трэба шукаць новыя рынкі. Расія — гэта добра вядомы, блізкі асабліва для Віцебскай вобласці рынак, але тут рэгулярна ўзнікаюць праблемы, і таму мы актыўна шукаем новых партнёраў. У гэтым годзе адкрылі для сябе каля дзесяці новых
Георгій Грыц, намеснік дырэктара Цэнтра сістэмнага аналізу і стратэгічных даследаванняў Нацыянальнай акадэміі навук Беларусі:
«Сітуацыя з так званымі гандлёвымі войнамі ўжо выходзіць не толькі за прынцыпы саюзніцкіх адносін, а ўжо за прынцыпы разумнасці».
«У беларускія харчовыя прадпрыемствы былі інвесціраваны вялікія грошы. І потым прадаваць за капейку экспартны тавар, які сёння ўваходзіць у топ-5 экспартных пазіцый Беларусі? Нешта тут не зрастаецца. Таму, я думаю, што, хутчэй за ўсё, або мы саюзнікі, мы ў рамках Саюзнай дзяржавы, Еўразійскай эканамічнай прасторы — або, можа, трэба недзе спыніцца ў інтэграцыйных працэсах і зрабіць нейкую паўзу. Расійскаму боку трэба вызначыцца, патрэбны яму такія адносіны ці не патрэбны».
РЭПАРТАЖ
Беларускія прадукты ў Азербайджане карыстаюцца вялікай папулярнасцю
Беларускія прадукты заўсёды славіліся выдатнай якасцю, у гэтым могуць пераканацца і азербайджанскія пакупнікі, якія маюць магчымасць знайсці прадукцыю на любы густ у магазінах «Беларускі» ў Баку. Каб даведацца, як ажыццяўляюцца пастаўкі ў магазіны, як дзейнічае сістэма кантролю якасці, азнаёміцца з асартыментам прадукцыі і даведацца меркаванні пакупнікоў, карэспандэнт Trend наведала адзін з магазінаў сеткі.
Магазіны сеткі «Беларускі» прапануюць шырокі асартымент беларускай прадукцыі высокай якасці. Тут пакупнікі могуць набыць малочныя і мясныя прадукты, алкагольныя напіткі, натуральныя сокі, а таксама хлебабулачныя вырабы і прысмакі.
Гандлёвая зала магазіна прасторная і добра асветленая, на стэлажах поўная выкладка прадукцыі, пакупнікі могуць скарыстацца спецыяльнымі каляскамі і карзінамі. Прыемнае ўражанне робіць дызайн магазіна, які выкананы ў этнічным беларускім стылі. У такім жа стылі ўніформа работнікаў магазіна. З пытаннямі наконт прадуктаў харчавання і іх асартыменту мы звярнуліся да кіраўніка магазіна Кямалі Меліхавай.
«Першы магазін «Беларускі» адкрыўся ў красавіку на праспекце Нарымана Нарыманава, недалёка ад Дзяржкамітэта па статыстыцы. У далейшым адкрыліся магазін у пасёлку Шувалан і трэці магазін на вуліцы Нізамі. Адкрываючы першы магазін, мы разлічвалі, што пакупнікі будуць задаволены, але атрымалася намнога лепш, чым планавалі. Многія пакупнікі выказвалі пажаданне, каб магазін «Беларускі» быў адкрыты і ў іншых частках горада, таму мы паступова адкрылі іншыя магазіны», — сказала Кямаля Меліхава.
Кіраўніцтва магазіна ўдзяляе вялікую ўвагу пажаданням і зваротам пакупнікоў, на аснове гэтых пажаданняў пашыраецца і асартымент прадукцыі.
«З дня адкрыцця магазіна асартымент прапануемай прадукцыі намнога пашырыўся. Калі пачыналі мы з продажу мясной і малочнай прадукцыі, то цяпер у продажы ёсць мучныя, кандытарскія вырабы, плануем завозіць мясныя, агароднінныя кансервы. Усё гэта робіцца па просьбах пакупнікоў, мы заўсёды прыслухоўваемся да іх меркавання. Асартымент у трох магазінах абсалютна аднолькавы — гэта адна сетка, адны і тыя ж тавары і вытворцы», — падкрэсліла Кямаля Меліхава.
Таксама вялікая ўвага ўдзяляецца якасці пастаўляемых прадуктаў, якія завозяцца кожны тыдзень.
«Мы працуем з вядучымі вытворцамі Беларусі, з тымі заводамі, якія прадстаўляюць нам сертыфікат якасці. У завезеных у магазін таварах мінімум хіміі, адсутнасць ГМА, адпаведна ў прадуктаў невялікі тэрмін годнасці. Калі прадукцыя не рэалізавана да заканчэння тэрміну годнасці, то яны забіраецца з прылаўка і ўтылізуецца. Пастаўка ажыццяўляецца ў дзень выпуску тавару. Прадукцыя адпавядае ўсім стандартам якасці як Азербайджана, так і Беларусі. Перыядычна да нас прыязджаюць прадстаўнікі кіраўніцтва вядучых заводаў — вытворцаў Беларусі для таго, каб азнаёміцца з тым, як захоўваецца прадукцыя ў магазіне і ці задаволена насельніцтва прапанаванымі таварамі», — сказала Кямаля Меліхава.
Прадукцыя, што прадаецца ў магазіне, суправаджаецца наклейкай з інфармацыяй аб вытворцу, саставе, тэрміне годнасці і г.д на азербайджанскай мове. Паводле слоў намесніка генеральнага дырэктара магазіна «Беларускі» Нарміны Алігусейнавай, гэта не павінна выклікаць сумненняў у пакупнікоў, гэтыя наклейкі друкуюцца і наклейваюцца на заводах-вытворцах.
Згодна з заканадаўствам, абавязкова павінен быць тэкст на азербайджанскай мове, таму што пакупнікі павінны разумець, што ўваходзіць у састаў прадукту. «Ажыццяўляецца двайны кантроль якасці — як з нашага боку, так і з боку заводаў у Беларусі», — падкрэсліла намеснік генеральнага дырэктара.
«Мы стараемся ўстанаўліваць цэны, каб яны былі не толькі канкурэнтнымі, але і, зразумела, даступнымі для нашых пакупнікоў. Нашы цэны практычна ідэнтычны цэнам на рынку», — сказала яна.
Як адзначала кіраўніцтва магазіна, яны з вялікай увагай ставяцца да сваіх пакупнікоў, якія гэта адчуваюць і адзначаюць высокую якасць прапанаванай прадукцыі.
Пенсіянерка Ніна Панчэка расказала, што яе ўнучка вучыцца ў школе, размешчанай недалёка ад магазіна, і таму, праводзячы яе на заняткі, яна заходзіць сюды. «Мяне прывабліваюць цэны, якасць і разнастайнасць прадуктаў. Звычайна я купляю малочную прадукцыю, вэнджаніну. Мне ў магазіне ўсё падабаецца, але, зразумела, хочацца, каб яшчэ больш пашырылі асартымент — з’явіліся свежазамарожаныя агародніна, ягады, а таксама саленні», — адзначыла пенсіянерка.
Урач Эльшад Мамедаў сказаў: «Мне падабаецца, што ў магазін можна пазваніць і даведацца, ці ёсць неабходныя мне прадукты. Асартымент купляемых мной тавараў разнастайны — гэта і малочныя прадукты, і прысмакі. Прыходзячы сюды, заўсёды бачу вялікую колькасць пакупнікоў, а гэта сведчыць аб тым, што яны задаволены якасцю прадукцыі».
Як падкрэсліла рэдактар Сабіна Сулейманава, адкрыццё магазіна «Беларускі» ў Баку — вельмі прыемная і пазітыўная навіна для ўсіх. «Я як чалавек, які яшчэ ў савецкі час пакаштаваў беларускія каўбасы, праз гады знайшла тут гэты смак нанава. Цэны ў магазінах прымальныя, даступныя для сярэднестатыстычнага жыхара краіны. Таксама тут вельмі ветлівы персанал, прыемная абстаноўка, і вельмі зручна, што магазін размешчаны ў цэнтры горада», — адзначыла яна.
А супрацоўнік мэблевага магазіна Чынгіз Мамедаў расказаў, што на працягу доўгага часу жыў у Мінску і добра знаёмы з выдатнай якасцю беларускіх прадуктаў. «Мяне радуе, што ў Баку я магу набыць для сваёй сям’і прадукцыю беларускіх вытворцаў. Вельмі хачу, каб у будучым магазін пашырыўся і павялічыў асартымент», — выказаў ён пажаданне.