Дабрачынная ёлка, на якую завіталі дзеці з розных населеных пунктаў нашага рэгіёну, прайшла 29 снежня ў раённым Цэнтры культуры. На “Навагоднія цуды ”, а менавіта так называлася цікавае казачнае прадстаўленне, падрыхтаванае для хлопчыкаў і дзяўчынак супрацоўнікамі раённага Цэнтра культуры, былі запрошаны дзеці з прыёмных і апякунскіх сем’яў, дзеці-інваліды, дзеці з дома сямейнага тыпу, а таксама хлопчыкі і дзяўчынкі, якія напярэдадні навагодніх святаў знаходзіліся ў сацыяльна-педагагічным цэнтры нашага раёна. Казачныя персанажы, падарункі і, вядома ж, цуды, чакалі ўсіх дзетак у гэты дзень. Стварыць сапраўдны навагодні настрой і ўбачыць шчаслівыя дзіцячыя ўсмешкі дапамагалі супрацоўнікі многіх аддзелаў і службаў раённага выканаўчага камітэта, у тым ліку аддзела адукацыі спорту і турызму райвыканкама,тэрытарыяльнага цэнтра сацыяльнага абслугоўвання насельніцтва,раённага аб’яднання прафсаюзаў, аддзела ідэалагічнай работы, культуры і па справах моладзі, фінансавага аддзела, раённага Цэнтра культуры, а таксама прыватнага ўнітарнага прадпрыемства “Аксігандль” (магазін “Мара”).
Ад імя Шаркаўшчынскага раённага выканаўчага камітэта хлопчыкаў і дзяўчынак з надыходзячым Новым годам і Калядамі павіншаваў старшыня раённага аб’яднання прафсаюзаў Ігар Віктаравіч Малюгін, які і ўручыў дзецям салодкія падарункі. А пад навагодняй ёлкай разам са сваімі бацькамі, настаўнікамі і выхавацелямі маленькія жыхары нагшага раёна вадзілі карагоды, спявалі песні і з радасцю апладзіравалі гарэзлівым казачным персанажам, якія падрыхтавалі для іх вясёлае свята. У такія моманты, калі дзіцячыя вочкі свецяцца ад шчасця, хоць на некаторы час адыходзяць у бок усе хваробы і цяжкасці. І бацькі ўсіх дзетак, запрошаных на дабрачынную ёлку, былі вельмі ўдзячныя за цікавае навагодняе свята.На працягу некалькіх гадзін пад прыгажуняй ёлкай хлопчыкаў і дзяўчынак у вобразах казачных персанажаў весялілі ў гэты дзень Сяргей Цыунчык, Таццяна Лаздоўская, Жанна Пундзіс, Аксана Міронава, Таццяна Крыўка, Алеся Русецкая, а таксама маленькія артысты тэатральнай студыі “Балаганчык”. Дабрачыннае мерапрыемства прайшло ў рамках акцый “Нашы дзеці” і “Прафсаюзы – дзецям”.
Вольга ЧАРНЯЎСКАЯ.
