Раённы агляд-конкурс агітбрыгад юных інспектараў дарожнага руху ў гэтым годзе праходзіў на базе Шаркаўшчынскай сярэдняй школы № 2. Яго арганізатарамі па традыцыі выступілі аддзел адукацыі, спорту і турызму райвыканкама і аддзяленне ДАІ Шаркаўшчынскага РАУС. Для ўдзелу ў раённым этапе спаборніцтваў свае атрады прадставілі 5 навучальных устаноў раёна, сярод якіх Більдзюжская, Лужкаўская СШ, Шаркаўшчынскія СШ № 1 і № 2, Іёдская ДС-СШ.
Дзеці спаборнічалі ў веданні правілаў дарожнага руху, дэманстравалі ўменне кіраваць веласіпедам, аказвалі першую медыцынскую дапамогу, прадстаўлялі свае тэматычныя газеты. Самым відовішчным конкурсам стала агітацыя за дарожную бяспеку. Тэматычныя песні, сцэнкі і мініяцюры, прафілактыка дарожнага траўматызму праз гумар і гульню — усё гэта можна было ўбачыць падчас яркіх выступленняў агітбрыгад.
— Каб выхаваць законапаслухмянае пакаленне, павага да правілаў дарожнага руху павінна фарміравацца яшчэ ў дзяцінстве, —упэўнены педагогі, якія рыхтавалі каманды да ўдзелу ў конкурсе. — Сутнасць руху ЮІД, якім захапляюцца сучасныя школьнікі, у тым ліку і вучні Шаркаўшчынскага раёна, у наступным: дзеці на ўласным прыкладзе вучаць сваіх равеснікаў і малодшых школьнікаў абавязкова выконваць усе патрабаванні правілаў дарожнага руху. А сам агляд-конкурс юных інспектараў — каманднае спаборніцтва, у якім рэзультат залежыць ад падрыхтоўкі і стараннасці кожнага з удзельнікаў.
Раённы этап агляду-конкурсу агітбрыгад юных інспектараў дарожнага руху завяршыўся перамогай вучняў Шаркаўшчынскай СШ № 2. На другім месцы — каманда сярэдняй школы № 1 нашага гарадскога пасёлка. Замыкае тройку лідараў каманда Лужкаўскай СШ. Дыпломы за перамогу камандам-удзельніцам, а таксама вучням, якія сталі пераможцамі ў асабістым першынстве падчас конкурсу «фігурнае” ваджэнне веласіпеда дзецям уручылі намеснік начальніка аддзела адукацыі, спорту і турызму райвыканкама Кацярына Рыгораўна Міхнёнак і інспектар ДПС Шаркаўшчынскага РАУС Міхаіл Сямёнавіч Фамін. Юныя інспектары дарожнага руху з Шаркаўшчынскай сярэдняй школы № 2 прадставілі наш рэгіён на занальным этапе конкурсу агітбрыгад у горадзе Браслаў.
Вольга ЧАРНЯЎСКАЯ.
