Чалавек і яго справа: участковы інспектар міліцыі Іёдскага сельсавета Сяргей Дарашчонак

Актуальное

шматлікія пытанні ўчастковы інспектар Сяргей Дарашчонак вырашае сумесна са старэйшынам аг. Іёды Мікалаем Падобам
шматлікія пытанні ўчастковы інспектар Сяргей Дарашчонак вырашае сумесна са старэйшынам аг. Іёды Мікалаем Падобам

У Шаркаўшчынскім раённым аддзеле ўнутраных спраў нясуць службу восем участковых інспектараў міліцыі. Двое з іх працуюць у гарадскім пасёлку, астатнія шэсць — на тэрыторыі сельсаветаў раёна. У абавязкі ўчастковых уваходзяць штодзённая работа з грамадзянамі, ахова грамадскага парадку, раскрыццё злачынстваў, супрацьстаянне алкагалізацыі насельніцтва, разгляд заяў і іншае.

З гэтымі службовымі задачамі паспяхова спраўляецца ўчастковы інспектар міліцыі Сяргей Георгіевіч Дарашчонак, які працуе на тэрыторыі Іёдскага сельскага Савета.

Яшчэ ў дзяцінстве мужчына марыў служыць у праваахоўных органах. Яго вабіла не толькі міліцэйская форма, але і магчымасць дапамагаць людзям. Таму адразу пасля тэрміновай службы ў арміі Сяргей Георгіевіч адзеў міліцэйскія пагоны. Пачатак праваахоўнай службы быў у горадзе Полацку, спачатку ў складзе патрульна-паставой службы, а затым у якасці ўчастковага інспектара.

Прыехаўшы ў родныя мясціны, ён зрабіў прапанову звязаць свае лёсы ў адзін мясцовай дзяўчыне Алесі. Так, у 2008 годзе Сяргей вяртаецца на малую радзіму, дзе і заступае на службу ў якасці ўчастковага інспектара міліцыі Іёдскага сельсавета. Маладой сям’і далі жыллё ў аграгарадку Іёды. У Сяргея і Алесі хутка нарадзілася першае дзіця — сын Алег.

— Ведаеце, самае складанае тое, што ў участковых інспектараў міліцыі няма такога паняцца, як “выхадны дзень”, — кажа Сяргей Георгіевіч. — У любы час сутак, у любое надвор’е трэба хутка спяшацца па выкліку, каб дапамагчы чалавеку вырашыць праблему. Але цяжкасці не палохаюць, а, наадварот, загартоўваюць волю і характар.

Праца ўчастковага інспектара міліцыі заснавана на цесным узаемадзеянні са школай, установамі медыцыны, культуры, са старэйшынамі аграгарадкоў і вёсак. Гэта прыносіць свае станоўчыя вынікі, бо менавіта з дапамогай сустрэч і сумесных гутарак з насельніцтвам, якія накіраваныя на прафілактыку злачынстваў і правапарушэнняў, пад пільным кантролем знаходзіцца крымінагенная сітуацыя на тэрыторыі сельсавета.

— За час службы я ніколі не пашкадаваў пра тое, што стаў праваахоўнікам, — падзяліўся сваімі думкамі наш суразмоўца. — А гэта значыць, што свой жыццёвы шлях я выбраў правільна, як кажуць у народзе, аднойчы і назаўжды.

Нядаўна ў сям’і Сяргея і Алесі Дарашчонкаў нарадзілася дачушка Агнія. Віншуем тату з мамай з гэтай вельмі важнай падзеяй у іх жыцці і зычым ім сямейнага шчасця і дабрабыту!

Сяргей РАЙЧОНАК.



Добавить комментарий

Ваш e-mail не будет опубликован. Обязательные поля помечены *