8 верасня ў Магілёве адбыўся семінар “Мэры за эканамічны рост” – флагманская ініцыятыва ЕС па падтрымцы развіцця на мясцовым узроўні. Удзел у семінары прынялі прадстаўнікі Еўрапейскага саюза ў Беларусі, прадстаўнікі рэгіянальных і мясцовых улад, сярод якіх і дэлегацыя Шаркаўшчынскага раёна, донарскія, а таксама зацікаўленыя некамерцыйныя арганізацыі, некаторыя іншыя структуры. Новы рэгіянальны праект Еўрапейскага саюза “Мэры за эканамічны рост” у цяперашні час рэалізуецца на тэрыторыі 6 краін Усходняга партнёрства: Азербайджана, Арменіі, Беларусі, Грузіі, Малдовы і Украіны. Дадзены праект накіраваны на паскарэнне мясцовага эканамічнага развіцця. Дэлегацыю Шаркаўшчынскага раёна на семінары ў Магілёве прадставілі намеснік старшыні райвыканкама Юрый Анатольевіч Васілеўскі, начальнік аддзела эканомікі Таццяна Іванаўна Мечаль, галоўны спецыяліст аддзела адукацыі, спорту і турызму Наталля Анатольеўна Арэшкава.
На семінары ўдзельнікам і патэнцыяльным партнёрам расказалі пра рэалізацыю ініцыятывы ў Беларусі, пра план мерапрыемстваў праекта да канца 2017 года. Спецыялісты таксама далі ацэнку запатрабаванням мясцовых улад па ўмацаванні іх патэнцыялу ў галіне эканамічнага развіцця, расказалі аб стратэгічным планаванні, тэматыцы трэнінгаў, акрэслілі тэрміны прадастаўлення планаў эканамічнага развіцця, паведамілі пра запуск пілотных праектаў і суправаджэнне іх рэалізацыі. Акрамя гэтага, у тэхнапарку “Магілёў” адбылася цырымонія ўручэння сертыфікатаў кіраўніцтву гарадоў аб далучэнні да ініцыятывы “Мэры за эканамічны рост”. Адзін з такіх сертыфікатаў атрымаў і намеснік старшыні Шаркаўшчынскага райвыканкама Юрый Анатольевіч Васілеўскі.
-Дадзены праект арыентаваны на развіццё супрацоўніцтва мясцовых улад з іншымі рэгіянальнымі партнёрамі . А мэта такога супрацоўніцтва – фарміраванне спрыяльнага бізнэс-клімату для забеспячэння эканамічнага росту і занятасці на месцах,-паведаміла галоўны спецыяліст аддзела адукацыі, спорту і турызму райвыканкама Наталля Анатольеўна Арэшкава.
Вольга ЧАРНЯЎСКАЯ.
