У мінулыя лістападаўскія дні ў Беларусі, у тым ліку ў нашым раёне, ушаноўвалі сельскіх працаўнікоў — руплівых і добрасумленных, простых і мудрых людзей ад роднай зямлі, на якой яны шчыруюць.
У новым будынку Зоркаўскага сельскага клуба адбылося ўрачыстае мерапрыемства, прысвечанае Дню работнікаў сельскай гаспадаркі і перапрацоўчай прамысловасці. Галоўнымі яго героямі былі лепшыя прадстаўнікі ААТ “Ельня-Агра”: земляробы, жывёлаводы, спецыялісты, кіраўнікі — усе, хто ўносіць свой значны ўклад у важную справу забеспячэння харчовай бяспекі нашага рэгіёну і краіны.
Нездарма прафесійнае свята работнікаў сельскай гаспадаркі адзначаецца напрыканцы лістапада: выкананы увесь комплекс палявых работ, можна падвесці вынікі, адпачыць, ушанаваць руплівых сяльчан узнагародамі і добрай песняй.
Галоўны вянец сельскагаспадарчай працы — хлеб. Святочны каравай кіраўніку сельгаспрадпрыемства Міхаілу Мікалаевічу Якімовічу уручыла загадчыца Зоркаўскага сельскага клуба Ірына Хаданёнак. Пасля чаго Міхаіл Мікалаевіч звярнуўся да прысутных на свяце. У сваім выступленні ён агучыў паказчыкі раслінаводства і жывёлагадоўлі, ад усёй душы выказаў работнікам сельскай гаспадаркі і ветэранам АПК ўдзячнасць за плённую працу і неацэнны вопыт, уручыў ім граматы і грашовыя прэміі.
Увазе прысутных быў прадэманстраваны відэафільм пра дасягненні і працоўныя будні роднага сельгаспрадпрыемства.
Эстафету віншаванняў працягнула старшыня пярвічнай арганізацыі прафсаюза ААТ “Ельня-Агра” Зоя Мікалаеўна Пажарская, якая пажадала далейшай плённай працы і моцнага здароўя, уручыла падарункі прадстаўнікам каллектываў МТФ “Юзефова”, “Зорка”, механізатарам, будаўнікам і іншым.
Да мікрафона запрасілі былога кіраўніка гаспадаркі Алега Вячаслававіча Ліпскага, які выказаў шчырыя словы падзякі вяскоўцам за працу, стараннасць, руплівасць і якасную прадукцыю, а таксама нагадаў імёны былых перадавікоў. На жаль, некаторых з іх ўжо няма разам з намі.
Са словамі віншавання выступіла галоўны заатэхнік сельгаспрадпрыемства Алена Вітальеўна Качан, якая пажадала поспехаў у працы, дабрабыту і фінансавай стабільнасці.
Самадзейныя артысты падрыхтавалі ў падарунак перадавікам яркую, цікавую канцэртную праграму. Урачыстае мерапрыемства надоўга застанецца ў памяці працаўнікоў сельскай гаспадаркі.
Алена АНАНІЧ.
