Напрыканцы лістапада ў горадзе Малетай (Літва) адбылося 37 пасяджэнне Савета Еўрарэгіёну “Азёрны край”, у якім удзельнічалі прадстаўнікі з Латвіі, Літвы і Беларусі. Шаркаўшчынскі рэгіён на сустрэчы дэлегацый з трох краін прадстаўлялі намеснік старшыні райвыканкама Юрый Анатольевіч Васілеўскі і гаоўны спецыяліст аддзела авдукацыі, спорту і турызму райвыканкама Наталля Анатольеўна Арэшкава.
На пасяджэнні былі абмеркаваны пытанні, якія датычацца падачы праектных заяў на конкурс праектных прапаноў Праграмы трансмежнага супрацоўніцтва Латвія – Літва – Беларусь 2014-2020 гады Еўрапейскага інструмента суседства.
Кіраўнік Латвійскага офіса Еўрарэгіёна Ілзэ Стабулніецэ падзялілася вопытам работы па ажыццяўленні буйных праектаў, што рэалізуюцца ў дадзены момант Латвійскім бюро Еўрарэгіёну. Кіраўнік праектаў Лайла Вілмане засяродзіла ўвагу прысутных на сацыяльным праекце, рэалізацыя якога ажыццяўляецца ў супрацоўніцтве з паўночнымі краінамі.
Таварыства Еўрарэгіён “Азёрны край” створана ў 1998 годзе. Зараз у яго складзе 15 самакіраванняў з Латвіі, 7 самакіраванняў з Літвы, 8 адміністрацый з Беларусі, у тым ліку і наш Шаркаўшчынскі раён.
У наступным годзе Еўрарэгіён адзначыць сваё 20-годдзе.
Вольга ЧАРНЯЎСКАЯ.