Працаўнікі сяла: механізатар ААТ “Буеўшчына” Ігар Грайчонак

Сельское хозяйство

79У адкрытым акцыянерным таварыстве “Буеўшчына” працуе шмат добрасумленных работнікаў, якія адказна адносяцца да выканання даручанай справы. Пра гэта гаварыў на справаздачным сходзе кіраўнік гаспадаркі Анатолій Буда. Сярод іншых дырэктар сельгаспрадпрыемства назваў і імя механізатара Ігара Грайчонка.

Мужчына нарадзіўся і вырас у гэтых мясцінах. Пасля тэрміновай службы пайшоў працаваць у тагачасны калгас 1-га Мая.

— З той пары прайшло шмат часу, — кажа нам Ігар, — але не шкадую, што застаўся ў сельскай мясцовасці. Тут усё сваё, роднае, блізкае сэрцу. Тут жывуць шчырыя і спагадлівыя людзі — родныя, сябры, знаёмыя. Тыя, хто заўсёды прыйдзе на дапамогу, каму і сам карысць сваімі справамі можаш прынесці.

Увесь гэты час я працую механізатарам. У маладосці асвоіў энерганасычаны трактар Т-150, якіх у гаспадарках ужо і не засталося. Затым быў МТЗ-80. А апошнія гады працую на МТЗ-1221, выконваю самыя розныя віды работ. Дваццаць чатыры сезоны запар, пачынаючы з 1994 года, як толькі саспее збажына, саджуся за штурвал зернеўборачнага камбайна. Убіраў ураджай на камбайнах Дон-1500, КЗС-10, КЗС-1218. Шчыра кажучы, вясковай працы не баюся, якой бы цяжкай яна ні была. А дома, пасля работы, мяне заўсёды чакае надзейны тыл — жонка Аксана і малодшы сын Арцём. Часта ў госці наведваецца старэйшы сын Аляксандр, які пражывае ў Глыбокім.

У аграрыяў пачалася гарачая пара — вясенняя сяўба. Зусім хутка палявыя работы разгарнуцца шырокім фронтам. Вось і Ігар Грайчонак, не губляючы часу зімой, падрыхтаваў свой энерганасычаны “Беларус”, каб разам з іншымі механізатарамі гаспадаркі зладжана, якасна і ў аптымальныя тэрміны правесці веснавую пасяўную кампанію.

Сяргей РАЙЧОНАК.



Добавить комментарий

Ваш e-mail не будет опубликован. Обязательные поля помечены *