Нягледзячы на тое, што цяпер на календары амаль сярэдзіна снежня, надвор’е зусім не зімовае. Тэмпература паветра то высокая, то нізкая, перыядычна ідуць дажджы. У гэты час вельмі актуальным з’яўляецца пытанне бяспекі на вадаёмах і каля іх, бо лёд на рэках, азёрах і сажалках нетрывалы і тоіць у сабе вялікую небяспеку. У сувязі з гэтым старшыня раённага таварыства выратавання на вадзе Уладзімір Катовіч звяртаецца да жыхароў нашага раёна з просьбай у такі перыяд быць надзвычай асцярожнымі. Лёд заўсёды прываблівае дзяцей, якія спяшаюцца апрануўшы канькі ці сеўшы на санкі, пакоўзацца па ім. У такім выпадку правілы бяспекі на вадаёмах і каля іх дзецям павінны растлумачыць іх бацькі і педагогі. У групу рызыкі ўваходзяць і рыбакі. Трэба заўсёды памятаць, што выхад на лёд у такі перыяд вельмі небяспечны.
Трэба адзначыць, што Шаркаўшчынскім райвыканкамам прынята распараджэнне № 219-р ад 10.10 2018 г. “Аб забароне выхаду на лёд”, згодна з якім на тэрыторыі Шаркаўшчынскага раёна забараняецца выхад на лёд, пакуль яго таўшчыня не дасягне 7-10 см.
Падрыхтавала Алена АНАНІЧ.