Раніцай 31 снежня на малочнатаварную ферму “Жукоўшчына” ААТ “Даватарскі” завіталі Дзед Мароз разам са Снягуркай. Так адміністрацыя сельгаспрадпрыемства, удзельнікі мастацкай самадзейнасці Жукоўшчынскага сельскага клуба вырашылі павіншаваць працаўнікоў жывёлагадоўлі з Новым годам і Калядамі.

У чырвоным кутку сабраліся работнікі фермы, завітаў начальнік аддзялення “Васюкі” Аляксандр Пяткевіч. Пасля ранішняга даення кароў, кармлення цялят, навядзення парадку на працоўных месцах выдаўся самы зручны час для віншаванняў.

— Паважаныя работнікі, я шчыра ўдзячны кожнаму з вас за нялёгкую працу жывёлавода, — сказаў Аляксандр Віктаравіч. — Дзякуючы вашым нястомным рукам, мы клапоцімся пра харчовую бяспеку дзяржавы, дабрабыт яе жыхароў. Цвёрда ўпэўнены, што працоўныя паказчыкі МТФ “Жукоўшчына” з кожным годам будуць расці і паляпшацца не толькі сярод малочнатаварных ферм нашай гаспадаркі, але і ў раёне. Жадаю кожнаму трывалага здароўя, міру і ўзаемапавагі ў сем’ях, фінансавага дабрабыту.

Затым казачныя персанажы — Дзед Мароз і Снягурка — правялі конкурсы для прысутных, пад вясёлыя песні разам вадзілі карагоды. І, нягледзячы на тое, што гэта дарослыя людзі, у жыцці якіх не вельмі часта надараюцца святы, тым не менш у кожнага з іх былі ў вачах іскрынкі радасці, шчасця і задавальнення. А напрыканцы мерапрыемства ўсе прысутныя атрымалі салодкія падарункі.

Сяргей РАЙЧОНАК.