Менавіта пад такой назвай праходзіў у Паставах двухдзённы, 15-ы па ліку, Міжнародны фестываль народнай музыкі. Гэта свята стала візітнай карткай нашых суседзяў-пастаўчан, якога з нецярплівасцю чакаюць кожны год не толькі жыхары, але і ўдзельнікі. На ўдзел у свяце былі запрошаны і майстры нашага раёна — Цэнтр рамёстваў і Дом ганчара, народны клуб нацыянальнай кухні “Груца”. Былі арганізаваны выстава-продаж вырабаў майстрыцамі Цэнтра, а кухняй — беларускіх народных страў. Варта нагадаць, што ў нашай вобласці створаны толькі чатыры нацыянальныя кухні, якія могуць пахваліцца адметнасцю сваіх страў. Сярод іх і “Груца”.
Запамінальным стала тое, што цікавіліся майстэрствам нашых умельцаў, набылі для сябе сувеніры намеснік міністра культуры Рэспублікі Беларусь Тадэвуш Стружэцкі, кіраўнік Нацыянальнага акадэмічнага народнага хору Рэспублікі Беларусь Міхаіл Дрынеўскі, дэлегацыі з Польшчы і Літвы.
Адметна, што ў першы дзень прабывання нашым удзельнікам была прадастаўлена галоўная плошча горада, а на другі — вызначана месца ў парку.
Цікава, змястоўна, запамінальна праходзіла традыцыйнае свята. Была магчымасць азнаёміцца з творчасцю звыш 30 калектываў, якія прадстаўлялі ўсе рэгіёны нашай краіны, а таксама Расію, Латвію, Літву, Казахстан, Украіну, Эстонію і іншыя.
Кацярына СОСНА