Масачны рэжым прынцыповы для зніжэння колькасці хворых на COVID-19, паведаміў карэспандэнту БЕЛТА загадчык кафедры інфекцыйных хвароб і дзіцячых інфекцый Беларускай медыцынскай акадэміі паслядыпломнай адукацыі Юрый Горбіч.
«Нашэнне масак — адзін з неабходных, прынцыповых, таксама як і сацыяльнае дыстанцыраванне, элементаў сістэмы па зніжэнні колькасці хворых у краіне людзей. Калі чалавек, крыніца каранавіруса, носіць маску, то верагоднасць заражэння навакольных зніжаецца прыкладна напалову. У той жа час калі абодва чалавека — і донар, і рэцыпіент каранавіруса — носяць маскі, то верагоднасць апошняга захварэць набліжаецца да ўзроўню статыстычнай хібнасці», — сказаў Юрый Горбіч.
Загадчык кафедры адзначыў, што нашэнне масак у грамадскім транспарце адназначна неабходна. Напрыклад, у аўтобусе высокая верагоднасць атрымаць інфіцыруючую дозу, паколькі ў халодную пару года ён едзе з цалкам закрытымі вокнамі, руху паветра практычна няма, а людзі знаходзяцца вельмі шчыльна адзін да аднаго, асабліва ў гадзіну пік.
На вуліцы верагоднасць атрымаць COVID-19 вельмі нізкая. «Калі ў парку мы знаходзімся на даволі далёкай адлегласці адзін ад аднаго, на тыя самыя паўтара метра, то вялікага практычнага сэнсу ў нашэнні маскі няма. Іншая справа, калі людзі знаходзяцца побач», — дадаў ён.
У многіх раёнах краіны ўведзены масачны рэжым. У масках людзі павінны быць не толькі на сваіх працоўных месцах, але і пры наведванні ўсіх без выключэння аб’ектаў. Насіць маску таксама абавязкова ў грамадскім транспарце, уключаючы маршруткі, метро, таксі.