Пачуць прапановы, як павінна развівацца краіна далей, ад кожнага зацікаўленага грамадзяніна. Менавіта для гэтага па ініцыятыве Прэзідэнта Рэспублікі Беларусь Аляксандра Лукашэнкі па ўсёй краіне працуюць дыялогавыя пляцоўкі. Іх фармат — канструктыўная размова. Заканадаўчыя ініцыятывы, мясцовае самакіраванне і сацыяльная сфера. Унесці свае прапановы можа кожны. Іх накіруюць у арганізацыйны камітэт па падрыхтоўцы Усебеларускага народнага сходу.
3 снежня дыялогавая пляцоўка прайшла ў Іёдскім сельскім выканаўчым камітэце. Удзел у ёй прынялі эксперты: член Савета Рэспублікі Нацыянальнага сходу Рэспублікі Беларусь, генеральны дырэктар камунальнага праектна-рамонтна-будаўнічага ўнітарнага прадпрыемства “Віцебскаблдарбуд” Уладзімір Матвееў, старшыня Шаркаўшчынскага раённага Савета дэпутатаў Уладзімір Шпец, начальнік аддзела ідэалагічнай работы, культуры і па справах моладзі райвыканкама Людміла Стома.
На мерапрыемстве, мадэратарам якога з’яўлялася старшыня Іёдскага сельвыканкама Жанна Палягошка, прысутнічаў актыў сельскага Савета: дэпутаты, старэйшыны вёсак, прадстаўнікі адміністрацыі адкрытага акцыянернага таварыства “Буеўшчына” і сацыяльных устаноў.
Прапановы, з якімі прысутныя выступілі перад прадстаўнікамі ўлады, адносіліся да розных накірункаў жыццядзейнасці насельніцтва. Было ўзнята пытанне аб магчымасці ўвядзення адзінага дзяржаўнага экзамена ў форме цэнтралізаванага тэсціравання пры дапамозе аб’яднання выпускных экзаменаў за курс сярэдняй школы і ўступных іспытаў у вышэйшыя навучальныя ўстановы.
Было агучана пытанне пра павышэнне адказнасці дзяцей за сваіх састарэлых бацькоў праз увядзенне нормы, якая магла б далучыць да даходу дзяцей аплату ўтрымання састарэлага чалавека ў стацыянарнай установе нагляду за састарэлымі.
Воіны-інтэрнацыяналісты выступаюць з пытаннем аб магчымасці прыраўнавання да статусу ветэранаў Вялікай Айчыннай вайны з адпаведнымі ільготамі.
Усе прапановы, якія былі агучаны падчас правядзення дыялогавай пляцоўкі, будуць накіраваныя ў Віцебскі абласны выканаўчы камітэт.
Сяргей РАЙЧОНАК.