Звычайнае шчасце людское Вольгі Чарняўскай

Сельское хозяйство

Вольга Чарняўская прымае віншаванні ад намесніка кіраўніка гаспадаркі Зінты Валюшкінай
Вольга Чарняўская прымае віншаванні ад намесніка кіраўніка гаспадаркі Зінты Валюшкінай

Калі на малочнатаварным комплексе № 1 аграгарадка Більдзюгі ААТ “Жвіранка” закончылася ранішняе даенне кароў, кіраўніцтва гаспадаркі запрасіла нас на жывёлагадоўчы аб’ект. Нагодай таму стала віншаванне начальніка комплекса Вольгі Чарняўскай з юбілеем.
— Вельмі многа ўвагі сёння да маёй асобы, — жартуе Вольга Міхайлаўна. — Але гэта вельмі прыемна, што цябе паважаюць, не забываюць.
З самага ранку юбіляр прымала віншаванні ад родных, блізкіх, суседзяў, калег. Не абышлі сваёй увагай знакавую дату ў жыцці Вольгі Міхайлаўны дырэктар сельгаспрадпрыемства Пётр Ананька і яго намеснік Зінта Валюшкіна. Яны ўручылі жанчыне шыкоўны букет кветак, падарачны сертыфікат, выказалі шмат цёплых і прыемных слоў.
— Нарадзілася я ў вёсцы Станіславова, — кажа Вольга Міхайлаўна. — Пасля заканчэння Лужаснянскага саўгаса-тэхнікума была магчымасць уладкавацца на працу ў тагачасны калгас “Іскра”. Але лёс распарадзіўся так, што першым маім працоўным месцам стаў былы калгас імя Кутузава з цэнтрам у вёсцы Більдзюгі. Тут я заняла пасаду заатэхніка-селекцыянера. Тут жа пазнаёмілася з будучым мужам Сяргеем, з якім і звязала сваё жыццё. Было гэта ў 1985 годзе, здаецца, зусім нядаўна.
У сям’і ў нас нарадзіліся дзве дачкі — Ірына і Таццяна. Пасля знаходжання ў дэкрэтным водпуску некаторы час працавала намеснікам старшыні гаспадаркі, на працягу чатырох год узначальвала Більдзюгскі сельскі Савет дэпутатаў. А калі ў 2005 годзе здалі ў эксплуатацыю гэты малочнатаварны комплекс, мне прапанавалі яго ўзначаліць. І вось 16 год я працую на дадзенай пасадзе.
Калектыў у нас таварыскі і з’яднаны, налічвае 13 чалавек, кожны ведае сваю справу. У жывёлагадоўчых памяшканнях утрымліваецца 600 галоў дойнага статку, ёсць цялушкі, маленькія цяляты. Часам, як і на любой рабоце, сустракаюцца пэўныя цяжкасці, але заўсёды праблемы дапамагае вырашаць кіраўніцтва і спецыялісты гаспадаркі.
Да таго ж і дома ў мяне моцны, надзейны тыл — муж Сяргей. Разам мы ўжо 34 гады, разам дзелім радасці і непрыемнасці, усмешкі і слёзы. Наогул, лічу, што ў маім жыцці ўсё склалася найлепшым чынам: сям’я, дзеці, любімая работа. Старэйшая дачка Ірына жыве ў Мінску, працуе ў Нацыянальнай акадэміі навук Беларусі, а малодшая Таццяна вучыцца ў педагагічным універсітэце імя Максіма Танка. У бліжэйшыя выхадныя яны завітаюць да нас, каб зноў сабрацца за вялікім сямейным сталом. Гэта і ёсць самае вялікае і самае сапраўднае шчасце для любога чалавека на зямлі.
Сяргей РАЙЧОНАК.