На дварэ сярэдзіна восені, не за гарамі зіма. Пагодныя дні сканчваюцца, наперадзе нас чакае непагадзь позняй восені, дажджы, першыя марозы. Таму ў сельгаспрадпрыемствах раёна спяшаюцца, пакуль надвор’е не сапсавалася, завяршыць усе важныя работы (пасяўную, падрыхтоўку глебы, уборку кукурузы, нарыхтоўку кармоў і іншае), пасля чаго можна будзе са спакойнай душой чакаць зімы.
12 кастрычніка мы наведалі ААТ “Буеўшчына”, на палетках якога завяршалася ўборка кукурузы. На малочна-таварным комплексе ў Варонцы ішла закладка здрабнёнай масы на сілас у траншэі.
– На ўборцы кукурузы ў нашай гаспадарцы задзейніча звяно вопытных механізатараў, – расказвае намеснік дырэктара па вытворчасці Аляксандр Гернат. – На комплексе КВК-800 яе здрабняе Вячаслаў Пабяржын, на адвозцы працуюць Аляксандр Слабовіч, Валерый Саўчанка, Віктар Баговіч, падчас закладкі ў траншэі трамбуе на “Амкадоры” Пётр Ерамееў. Некаторы час дапамогу аказваў прысланы Глыбоцкай інтэграванай структурай “Ягуар”, але цяпер спраўляемся ўласнымі сіламі. Трэба сказаць, што сёлета кукуруза ў нас вырасла лепшая, чым у мінулым годзе. Усе нашы механізатары забяспечаны гарачым харчаваннем. Штодзённа вядзецца ўлік працоўных дасягненняў, лепшыя працаўнікі і пераможцы спаборніцтва будуць узнагароджаны на ўрачыстым сходзе, прысвечаным Дню работнікаў сельскай гаспадаркі.
Пасля гэтага кіруемся да вёскі Снегі, на палетках каля якой ішла ў той дзень уборка кукурузы. Дабрацца туды аказваецца няпроста, мы доўга едзем па ўбраным кукурузным полі, а потым яшчэ пешшу пераходзім цераз канаву. Зрэшты, і трактару праехаць тут няпроста. Адзін з іх якраз загруз ў напоўненай вадой каляіне. Але ў механізатараў безвыходных сітуацый не бывае, яны заўсёды прыходзяць адзін аднаму на дапамогу. Магутны КВК-800З выцягвае з лужыны трактар з прычэпам, і адразу ж, не марудзячы, тэхніка выязджае на кукурузны палетак працягваць уборку. Трэба спяшацца, бо калі пачнуцца дажджы, глеба размякне, і сюды будзе ўжо не заехаць.
На 13 кастрычніка ў ААТ “Буеўшчына” было скошана 269 га кукурузы, убрана 3825 тон, з якіх закладзена сіласу 3080 тон. Ураджайнасць кукурузы склала 142 ц/га. Усяго ж у гаспадарцы нарыхтавана 19 цэнтнераў кармавых адзінак на ўмоўную галаву жывёлы.
Андрэй БУРЭЦ.