Умовы надвор’я не дазваляюць аграрыям весці палявыя работы на поўную моц, але вяскоўцы не сядзяць без справы. Чым яны займаюцца, мы даведаліся, калі наведалі цэнтральныя механічныя майстэрні ААТ «Агратэхсэрвіс».
З самага ранку тут чутны скрыгат такарных станкоў, стук малаткоў, бачны бляск электрагазазваркі. І механізатары, і слесары ў працоўным працэсе.
Падчас вясенняй пасяўной кампаніі ў сельгаспрадпрыемствы накіроўваюцца для праходжання вытворчай практыкі навучэнцы сельскагаспадарчых каледжаў. Будучыя спецыялісты аграрнай галіны практыкуюцца і ў ААТ «Агратэхсэрвіс». Кірыл Рэдзіка займаецца на 1 курсе Ульскага дзяржаўнага каледжа, яго сябар Арцём Абрамаў таксама першакурснік, але вучыцца ў Відзаўскім дзяржаўным каледжы. Самы старэйшы з іх Яўген Зубаў, хлопец займаецца на трэцім курсе Глыбоцкага дзяржаўнага каледжа. Юнакі з ахвотай на практыцы замацоўваюць тэарэтычныя веды, якія атрымалі ў сваіх навучальных установах. У хуткім часе некаторыя з іх адправяцца на тэрміновую службу, але, як запэўнілі самі хлопцы, абавязкова вернуцца на сваю малую радзіму, бо працу ў сельскай гаспадарцы кожны з іх абраў свядома.
Сяргей РАЙЧОНАК, фота аўтара.
