Аператар машыннага даення малочнатаварнай фермы «Наваселле» ААТ «Агратэхсэрвіс» Людміла Арлюкевіч па выніках раённага спаборніцтва за сакавік заняла трэцяе месца.
У гурце, за якім даглядае жанчына, налічваюцца 46 кароў і 22 цялушкі. Сярэдні надой ад адной рагулі за мінулы месяц склаў 529 кілаграмаў малака. Пры гэтым сярэдняя лічба па малочнатаварнай ферме складае 374 кілаграмы.
— На нашай ферме ўтрымліваецца 341 карова, — тлумачыць брыгадзір вытворчай брыгады МТФ «Наваселле» Раіса Вярцінская. — Іх, а таксама цялушак, маленькіх цялятак абслугоўваюць шэсць пастаянных аператараў машыннага даення і адна падменная. Заўсёды ў наяўнасці якасны корм: сена, сілас, сянаж, канцэнтраты. За сакавік валавы надой малака па ферме склаў 127 тон 570 кілаграмаў. А гэта самы высокі паказчык у сельгаспрадпрыемстве.
Немалаважным фактарам у забеспячэнні высокіх надояў з’яўляюцца і адносіны работнікаў фермы да жывёлы. Кожная даярка зацікаўлена ў станоўчых выніках сваёй працы. Напрыклад, Людміла Арлюкевіч. Жанчына працуе ў нас два гады, але за гэты кароткі тэрмін зарэкамендавала сябе са станоўчага боку. Сумленна выконвае свае абавязкі, пільна сочыць за станам жывёлы.
— Я ўпэўнена, што для кожнага аператара машыннага даення важна не толькі колькасць атрыманага малака, але і яго якасць, — кажа жанчына. — Гэтыя два паказчыкі павінны быць на адным узроўні.
З маленства палюбіла працу ў жывёлагадоўлі. Пасля заканчэння школы стала даяркай у былым калгасе імя Фрунзе. З таго часу прайшло трыццаць гадоў. Па жыццёвых абставінах прыйшлося змяніць месца жыхарства, але любімай справе я не здрадзіла. Па-ранейшаму працую аператарам машыннага даення. Справу сваю вельмі люблю. У нашым невялікім калектыве пануюць сяброўскія адносіны, не бывае спрэчак, наадварот, заўсёды разам выконваем сваю работу.
Сяргей РАЙЧОНАК, фота аўтара.