Правільнасць заключэння калектыўных дагавораў, захавання заканадаўства аб ахове працы, прафілактыка вытворчага траўматызму і іншае — тэмы, якія знаходзяцца пад пільным кантролем прафсаюзаў.
Прававы інспектар працы Віцебскай абласной арганізацыі Беларускага прафсаюза работнікаў аграпрамысловага комплексу Святлана Кузьміна правяла семінар-нараду для прафсаюзнага актыву раёна: старшынь пярвічных прафсаюзных арганізацый, грамадскіх інспектараў па ахове працы, спецыялістаў аддзелаў кадраў.
Сярод найбольш частых пытанняў, якія закраналіся ў час гутаркі, былі: незаконнае звальненне, датэрміновае скасаванне тэрміновых працоўных дагавораў, памылкі ў налічэнні заробку і дадатковых выплат, а таксама парушэнні парадку канчатковага разліку пры звальненні.
Да прававога юрыста звярталіся за тлумачэннямі па пытаннях матэрыяльнай дапамогі для аздараўлення, прадастаўлення адпачынку ў прафсаюзных санаторыях, афармлення працоўных і сацыяльных адпускоў, вяртання незаконна ўтрыманых сродкаў, аплаты камандзіровачных расходаў, работы па сумяшчальніцтве і дадатковых выхадных днях для шматдзетных бацькоў.
— Прафсаюзныя юрысты не абмяжоўваюцца вуснымі кансультацыямі. Мы аказваем рэальную дапамогу ў падрыхтоўцы працэсуальных дакументаў, зваротаў у дзяржаўныя органы, каб абараніць працоўныя правы работнікаў на кожным этапе, — рэзюмавала Святлана Кузьміна.
Сяргей РАЙЧОНАК, фота аўтара.
