13 лютага адбылася сустрэча кіраўнікоў і прадстаўнікоў ветэранскіх арганізацый воінаў-інтэрнацыяналістаў Глыбоцкага, Пастаўскага, Міёрскага, Верхнядзвінскага, Шаркаўшчынскага раёнаў. Наш раён прадставілі кіраўнік раённай ветэранскай арганізацыі воінаў-інтэрнацыяналістаў Іван Матыскін, а таксама Антон Паўловіч, Васілій Протас.
Напачатку ўдзельнікі мерапрыемства накіраваліся ў Ахрэмаўскую сярэднюю школу. Ва ўрачыстай атмасферы, каля мемарыяльнай дошкі, прысвечанай былому вучню гэтай школы Валерыю Александровічу, пад гукі школьнага духавога аркестра пад кіраўніцтвам Віктара Скур’ята гучалі цёплыя словы пра мужнага браслаўскага героя, жыццё якога вельмі рана абарвалася ў чужой, далёкай краіне Афганістан.
Пасля дэлегацыя войнаў-інтэрнацыяналістаў накіравалася на могілкі, дзе пахаваны Валерый Александровіч. Хвілінай маўчання ўшанавалі прысутныя памяць аб загінуўшым, ўсклалі кветкі на магілу.
Госці наведалі музей, прысвечаны воінам-афганцам, які знаходзіцца ў памяшканні СШ № 1 імя А. М. Жданава.
Вітаючы гасцей, дырэктар школы Тамара Стома расказала гісторыю стварэння музея, выказала словы ўдзячнасці воінам-інтэрнацыяналістам за прадастаўленыя экспанаты і за дапамогу ў афармленні экспазіцыі.
Дарэчы, ідэя ўвекавечыць памяць браслаўскіх землякоў, якія прайшлі небяспечнымі дарогамі Афганістана, нарадзілася ў старшыні Браслаўскага РГА “Беларускі Саюз ветэранаў вайны ў Афганістане” Леаніда Мікшты.
Асабліва шматлюдна было ў гэты дзень у Браслаўскім гарадскім скверы каля памятнага знака воінам-інтэрнацыяналістам. Акрамя ўдзельнікаў урачыстасці сюды прыйшлі школьнікі, моладзь і людзі старэйшага пакалення, каб ушанаваць памяць тых, хто не вярнуўся з поля бою.
Затым мерапрыемства прадоўжылася ў актавай зале СШ № 2, дзе адбылася ўрачыстасць пад назвай «Паклон героям пакаленняў». Са шчырымі словамі ўдзячнасці і віншавання звярнулася да афганцаў старшыня Браслаўскага раённага Савета дэпутатаў Ніна Пучынская. Ад райвыканкама, раённага Савета дэпутатаў, ад арганізацый, прадпрыемстваў і ўстаноў раёна кожнаму кіраўніку раённых арганізацый грамадскага аб’яднання «Беларускага Саюза ветэранаў вайны ў Афганістане» ўручылі памятныя падарункі.
Да прысутных звярнуўся Іван Матыскін, падзякаваў усім ветэранам Афганістана за іх мужнасць, праяўленую ў гарачых кропках, за смелыя і рашучыя дзеянні пры выкананні воінскага абавязку, таксама падзякаваў браслаўчанам за гасцінную сустрэчу, пажадаў моцнага здароўя і аптымізму.
Прысутным прыйшліся даспадобы песні ў выкананні былых афганцаў Васілія Протаса, Яўгена Падагеля, Станіслава Ставіцкага, Міхаіла Кабёлкі.
Добрым настроем зарадзілі прысутных гасцей артысты Браслаўскага Дома культуры.
Сяргей ВЫСОЦКІ.
