Усе добра памятаюць моцны ўраган, які пранёсся над Шаркаўшчынай 11 ліпеня. Шмат было пашкоджана жылых дамоў, гаспадарчых пабудоў. Сярод іншых аб’ектаў аказалася цалкам разбуранай і жывёлагадоўчая ферма ў вёсцы Маркі КУВСП імя Маркава.
Сумеснымі намаганнямі працаўнікоў гэтага сельгаспрадпрыемства, з дапамогай тэхнікі арганізацый гарадскога пасёлка і з удзелам работнікаў устаноў раённага цэнтра штодзённа праводзіліся работы па разборцы завалаў, вывазе смецця. На аб’екце праводзіліся суботнікі для навядзення парадку.
— У хуткім часе было прынята рашэнне аб ўзвядзенні на месцы аднаго з разбураных хлявоў тэнтавага арачніка, — кажа намеснік дырэктара КУВСП імя Маркава Пётр Курэц. — Была выдзелена адпаведная сума грошай з рэспубліканскага, абласнога і раённага бюджэтаў, укладзены сродкі нашага сельгаспрадпрыемства на набыццё і мантаж неабходнага абсталявання. Узвядзеннем канструкцыі займалася адкрытае акцыянернае таварыства “Ціраспальская ПМК” з горада Віцебска.
У дадзены момант у арачніку вядуцца ўнутраныя работы сіламі гаспадаркі для хутчэйшай пастаноўкі жывёлы. Мяркуем, што на бяспрывязным утрыманні там размесцяцца каля двухсот галоў буйной рагатай жывёлы.
Сяргей РАЙЧОНАК
