Кожны год у нашым раёне праводзяць свой працоўны семестр студэнты вышэйшых навучальных устаноў і навучэнцы каледжаў. Не выключэннем была і гэта працоўная восень. Адзін са студэнцкіх атрадаў працаваў на будаўніцтве жывёлагадоўчага комплексу фермы Каралева ААТ “Княж”.
За работай сустрэлі студэнтаў трэцяга курса будаўнічага факультэта Полацкага дзяржаўнага ўніверсітэта. Пагутарыць з намі згадзіўся камандзір студатрада Антон Рубін.
— Якія работы выконваеце на будаўніцтве?
— Робім цагляную кладку. Некалькі дзён выконвалі бетонныя работы.
— Вы выбралі для сябе будаўнічую спецыяльнасць. Ці падабаецца яна вам?
— Мы — будучыя інжынеры-будаўнікі прамысловага і грамадзянскага будаўніцтва. Думаем, што не памыліліся ў выбары прафесіі.
— Як вас сустрэлі ў гаспадарцы?
— Вельмі добра. Для жылля — выдзелілі спартыўную залу ў Германавічах. Ранкам і вечарам харчуемся ў сталовай гаспадаркі, а абеды нам прывозяць прама на будаўнічы аб’ект. Усё смачнае і для нас бясплатнае.
— А як наконт культурнай праграмы?
— Ходзім у Германавічы на дыскатэку, прымалі ўдзел у некаторых мерапрыемствах, якія там праводзіліся.
— А ці думаеце яшчэ сюды прыехаць?
— Пару хлопцаў дык абавязкова, бо завялі тут сяброўства з мясцовымі дзяўчатамі.
Цікава было паразмаўляць з маладымі хлопцамі, поўнымі аптымізму, бадзёрасці, весялосці, упэўненасці ў заўтрашнім дні. Якая гэта цудоўная пара — студэнцкая!
Кацярына СОСНА.
Фота Марыны ЖАКАЎКА