Пры касцёле “Узвышэння Святога Крыжа” ў Шаркаўшчыне 17 год ажыццяўляе сваю дзейнасць нядзельная школа, дзе творча і цікава ў хрысціянскіх традыцыях, грунтуючыся на маральна-духоўных каштоўнасцях, праводзяцца заняткі па рэлігійным выхаванні. Дзеці вывучаюць Біблію і кнігі Святога Пісання, наведваюць богаслужэнні ў касцёле, спяваюць у хоры, знаёмяцца з фільмамі біблейскай тэматыкі, і абмяркоўваюць іх сюжэты. Настаўніца рэлігіі Галіна Іванаўна Трызна расказала нам, як праходзяць заняткі:
— Кожнаму ўзросту ўласцівыя ўнікальныя асаблівасці ўспрымання, якія варта ўлічваць. Заняткі праводзяцца для дзяцей з першага па адзінаццаты клас, запісацца і наведваць могуць усе жадаючыя. Навучальны год у нядзельнай школе пачынаецца ў верасні і заканчваецца ў маі. Кожны клас наведвае заняткі адзін раз ў тыдзень па буднях, а таксама дзеці прыходзяць на богаслужэнні ў нядзелю, дзе хлопчыкі служаць пры алтары. Вядома, маладыя людзі маюць права на ўласнае рашэнне. Ім вырашаць, што ў далейшым рабіць з тым, што яны набылі. Але як раз для таго, каб даць магчымасць выбару, мы і павінны пазнаёміць людзей з рэлігійнымі поглядамі.
Сваімі ўражаннямі ад заняткаў падзяліліся некаторыя наведвальнікі.
Кірыл Скавырка: “Я зразумеў, што трэба любіць свайго бліжняга як сябе самога, даведаўся пра каталіцкія святы, стаў больш паслухмяным”.
Карына Кавалеўская: “Заняткі ў нядзельнай школе прыблізілі мяне да Бога. Я больш стала хадзіць у касцёл і лепш стала вучыцца”.
Па словах Галіны Іванаўны, заняткі праходзяць у форме дыялогу, дзеці вучацца думаць і гаварыць, выказваць свае думкі і меркаванні, абмяркоўваюць найбольш хвалюючыя праблемы і шукаюць разам на іх адказы. Сярод старшакласнікаў застаецца актуальнай тэма станаўлення моладзі ў сучасным грамадстве, паважных адносін да акружаючых людзей. Трэба адзначыть, што ў наведвальнікаў нядзельнай школы шмат іншых захапленняў, многія хлопчыкі і дзяўчынкі актыўна займаюцца спортам, музыкай, маляваннем, наведваюць школу мастацтваў і адначасова вызначаюцца добрай паспяховасцю па агульнаадукацыйных прадметах у школе. У дзяцей, якія навучыліся разумна планаваць свой вольны час, многае атрымліваецца. А заняткі ў нядзельнай школе таксама дапамагаюць сучаснаму школьніку сфарміравацца як асобе, вызначыць важныя маральныя арыенціры і прынцыпы.
Сяргей ВЫСОЦКІ.
