Святочнае мерапрыемства, прысвечанае 75-годдзю ўтварэння раёна і ўшанаванню лаўрэатаў звання»Чалавек года Шаркаўшчыны-2014″ (фота)

6 сакавіка ў раённым Цэнтры культуры адбылася ўрачыстасць, прысвечаная 75-годдзю ўтварэння Шаркаўшчынскага раёна. У рамках святочнага мерапрыемства прайшло таксама ўшанаванне лаўрэатаў Ганаровага звання “Чалавек года Шаркаўшчыны”.
У фае і танцавальнай зале РЦК прэзентаваліся тэматычныя выставы з нагоды юбілею раёна, прадстаўленыя райкамам БРСМ, установамі культуры і адукацыі. Беларускія найгрышы на народных інструментах выконваў ансамбль выкладчыкаў дзіцячай школы мастацтваў. Цікавую фотавыставу прадставіў фатограф Валянцін Гарадзецкі, у работах якога адлюстравана гісторыя Шаркаўшчынскага раёна. Кансервавы завод гандляваў смачнай кандытарскай выпечкай, гарачай гарбатай і кавай.
Урачыстасць пачалася з выканання гімна Шаркаўшчынскага раёна салістамі народнага хору “Спадчына”. Пад барабанны дроб у суправаджэнні ансамбля “Рэзананс” выступіў гурт барабаншчыц.
У гісторыі раёна было нямала старонак, напоўненых радасцю і горам, перамогамі і паражэннямі, дасягненнямі і заняпадамі. Вядучыя запрасілі прысутных прагледзець тэатралізаваны гістарычны блок. У яго першым эпізодзе паказалі, як на вызваленых ад польскіх інтэрвентаў землях Заходняй Беларусі пачынала ўсталёўвацца савецкая ўлада, утварыліся новыя адміністрацыйна-тэрытарыяльныя адзінкі, у тым ліку і Шаркаўшчынскі раён. Неўміручаму подзвігу нашых землякоў, якія змагаліся з ворагам у 1941—1945 гадах, быў прысвечаны наступны блок тэатралізацыі. Жыццё пад мірным небам, аднаўленне сельскай гаспадаркі і прамысловасці, працоўныя будні і святы шаркаўчан знайшлі адлюстраванне ў трэцім блоку пастаноўкі.
На свяце прысутнічаў старшыня Віцебскага абласнога аб’яднання прафсаюзаў, дэпутат абласнога Савета дэпутатаў ад Шаркаўшчынскай выбарчай акругі І. К. Вазміцель. Іван Канстанцінавіч зачытаў прывітальны адрас ад старшыні Віцебскага аблвыканкама Мікалая Мікалаевіча Шарстнёва з нагоды 75-годдзя ўтварэння Шаркаўшчынскага раёна і ўручыў яго старшыні райвыканкама Мікалаю Ірынархавічу Баговічу. За шматгадовую добрасумленную працу Ганаровымі граматамі аблвыканкама ўзнагароджаны ветэраны працы Іван Казіміравіч Курто і Генадзій Міхайлавіч Скапец. У якасці падарунка І. К. Вазміцель перадаў сацыяльна-педагагічнаму цэнтру камп’ютар.
Затым слова прадставілі старшыні раённага выканаўчага камітэта Мікалаю Ірынархавічу Баговічу:
— Сёння мы разам святкуем 75-годдзе нашага раёна. Азіраючыся на пройдзены час, з упэўненасцю можна сказаць, што ўсе пакаленні шаркаўчан імкнуліся і імкнуцца зараз жыць і працаваць так, каб наш край багацеў і прыгажэў, а дзеці заўсёды ганарыліся сваімі бацькамі і малой радзімай. У юбілейны для нашага раёна год мы, па добрай традыцыі, ушаноўваем герояў працы, чыімі рукамі ствараецца дабрабыт края і дзяржавы — лаўрэатаў Ганаровага звання “Чалавек года Шаркаўшчыны”. Асаблівых слоў удзячнасці заслугоўваюць нашы ветэраны Вялікай Айчыннай вайны, працаўнікі тылу, якія, мужна вытрымаўшы ўсе жахі ваеннага ліхалецця, заваявалі для нас Перамогу. Сёння даніну павагі мы аддаём ветэранам працы, дзякуючы якім адбывалася станаўленне народна-гаспадарчага комплексу раёна, яго ўстойлівае развіццё ў мірны час. Мы ў поўнай меры ганарымся таленавітай шаркаўшчынскай моладдзю і цвёрда верым, што іх сённяшнія дасягненні — гэта ўсяго толькі пачатковая прыступка да тых поспехаў, якія чакаюць кожнага з іх у будучым.
Далей прайшла цырымонія ўзнагароджвання. Першымі для віншавання на сцэну выйшлі ветэраны працы. Ганаровую грамату раённага выканаўчага камітэта Мікалай Ірынархавіч Баговіч уручыў былому першаму сакратару райкама КПБ Мечыславу Часлававічу Сезянеўскаму. Падзякай кіраўніка раёна адзначаны 19 ветэранаў працы, якія зрабілі вялікі ўклад у сацыяльна-эканамічнае развіццё раёна. Кожнаму з іх уручылі памятныя падарункі кіраўнікі прадпрыемстваў арганізацый і ўстаноў, дзе ў свой час працавалі ветэраны.
Юбілейныя медалі “70 год Перамогі ў Вялікай Айчыннай вайне 1941—1945 гадоў” старшыня раённага выканаўчага камітэта М. І. Баговіч і камісар райваенкамата А. В. Дубовік уручылі ветэранам Вялікай Айчыннай вайны, працаўнікам тылу і былым вязням фашысцкіх канцлагераў.
Лепшым вучням школ раёна Мікалай Ірынархавіч Баговіч уручыў Падзякі старшыні райвыканкама за перамогу ў абласных і раённых прадметных алімпіядах, актыўны ўдзел у грамадскім жыцці. Бацькі і настаўнікі вучняў таксама адзначаны Падзякамі кіраўніка раёна.
Ад імя школьнікаў выступіла вучаніца СШ № 2 гарадскога пасёлка Ірына Мікулан. Дзяўчына падзякавала раённай уладзе, педагогам і бацькам за клопат, дала абяцанне, што яны, прадстаўнікі маладога пакалення, будуць дастойнымі прадаўжальнікамі слаўных традыцый жыхароў Шаркаўшчынскага краю.
На падставе рашэння райвыканкама ад 16 лютага 2015 года № 105 за значны ўклад у дынамічнае развіццё раёна Ганаровае званне “Чалавек года Шаркаўшчыны” прысвоена 15-ці працаўнікам розных сфер. Кожны з іх атрымаў з рук старшыні раённага выканаўчага камітэта нагрудны знак, дыплом і грашовую прэмію.
Напрыканцы цырымоніі М. І. Баговіч яшчэ раз выказаў шчырую ўдзячнасць за самаадданую працу, сумленнае выкананне грамадзянскага і службовага абавязкаў усім, хто стварае слаўны летапіс нашага Шакаўшчынскага раёна.
Святочны і радасны настрой пасля афіцыйнай часткі мерапрыемства гледачам падарыў Нацыянальны акадэмічны народны хор Рэспублікі Беларусь імя Генадзія Цітовіча.
Сяргей РАЙЧОНАК.
Фота аўтара і Валерыя КАВАЛЁНКА.

Фота Сяргея РАЙЧОНКА