Раённы хлебапрыёмны ўчастак РУВП “Глыбоцкі камбікормавы завод” пастаянна аказвае паслугі шаркаўчанам і жыхарам раёна па размоле зерня. Размалоць 100 кілаграмаў зерня на цяперашні дзень каштуе 4 тысячы беларускіх рублёў (пасля 1 кастрычніка стане расцэнкі ўзрастуць). Скарыстацца дадзенай паслугай шаркаўчане і жыхары раёна маюць магчымасць па аўторках і чацвяргах з 8 да 17 гадзінаў. Адказны на дадзеным участку працы майстар па рамонце прамысловага абсталявання Юрый Болт.
— Тэхніка для размолу нямецкая, надзейная, зручная ў выкарыстанні, — коратка знаёміць ён мяне з сітуацыяй. — Працуе без збояў і хутка. Колькасць наведвальнікаў розная, дзень на дзень не прыходзіцца, вось сёння да абеду паслугамі скарысталіся 7 чалавек. Бывае і болей.
У час нашага наведвання ён якраз заняты размолам зерня жыхару
гарадскога пасёлка Іосіфу Усцінавічу Хралу. Зерне ўжо засыпана ў ёмістасць на другім паверсе, апарат уключаны і з двух трубаў унізе папераменна ў мяхі сыплецца размолатае зерне. 10 хвілін і справа закончана. У мяхах 100 кілаграмаў мукі, якая пойдзе на корм свінням.
— Зручна? — пытаемся ў гаспадара, пакуль ён разлічваецца і грузіць мяхі ў багажнік легкавушкі.
— Канешне, зручна, — адказвае ён. — Вырасціў на сваім участку зерне, цяпер вось размалолі на муку, усё ж купляць не трэба, лішняя капейка зберажэцца.
Андрэй БУРЭЦ