Праходзячы міма райнарыхтпрама, заўважыў паўным-паўнютка наладаваную мяхамі з яблыкамі легкавушку: поўны багажнік, заднія сядзенні і нават пярэдняе. Калі машыны завіхаўся пажылы мужчына. Ён хутка і спрытна, не марудзячы, пераносіў мяхі з машыны ў памяшканне прыёмнага пункта, дзе складаў іх на вагі. Не маглі прамінуць міма і пацікавіліся, хто ён і адкуль. Гэта аказаўся Савелій Цярэнцьевіч Міхайлаў, жыхар вёскі Шкялі.
— Мяхоў пятнаццаць прывёз, — сказаў ён. — Яблыкі са свайго саду, антонаўка, грыштэйн, папінка. Ураджай у параўнанні з мінулымі гадамі сёлета не надта вялікі. Але ўсё адно ёсць, што назбіраць і здаць.
— Гэта адзін з лепшых нашых здатчыкаў — гаворыць загадчыца магазіна № 21 Лена Георгіеўна Анецька, — на яго рахунку ўжо паўтары тоны здадзеных яблыкаў. Так, тут 214 кілаграмаў, — вызначае яна вагу складзеных гарой 8 мяхоў. — Здымайце і накладвайце наступныя.
Што ж, не хацелася далей замінаць Савелію Цярэнцьевічу. Тым болей, простыя арыфметычныя падлікі мы можам зрабіць і самі. Яблыкі прымаюць па 1250 рублёў за кілаграм, гэта значыць кожныя 100 кілаграмаў здадзеных яблыкаў прынясуць яму болей за 100 тысяч рублёў. Вось такі прыбытак ад уласнага саду.
Андрэй БУРЭЦ
Суббота, 18.04.2026