25—26 чэрвеня, у суботу і нядзелю, у парафіі святой Ганны ў вёсцы Мосар адбудзецца адпустовая ўрачыстасць святога Яна Хрысціцеля. На гэту ўрачыстасць заўсёды збіраецца шмат людзей у Мосарскай святыні, каб тут, адарваўшыся ад штодзённай мітусні, узнесці свае самыя патаемныя малітвы і просьбы да Бога праз нашых нябесных заступнікаў святых Яна Хрысціцеля і Юстына Мучаніка. Будзем разам прасіць аб цвярозасці для нашага народа, нашых сем’яў і нас саміх… Без Божай ласкі і дапамогі, без моцнай веры вельмі цяжка перамагчы зло алкагалізму і наркаманіі. Таму і просім Пана нашага, Айца Міласэрнага, узносячы свае малітвы праз пасярэдніцтва святога Яна Хрысціцеля — патрона цвярозасці і святога Юстына — аднаго з першых абаронцаў веры.
Дарагія браты і сёстры, запрашаем вас прыняць удзел у нашай агульнай малітве за цвярозасць нашага народа, за захаванне добрых хрысціянскіх традыцый, якія нам перадалі нашы дзяды і прадзеды. Расклад набажэнстваў на ўрачыстасць Яна Хрысціцеля:
Субота, 25 чэрвеня
10.00 — Святая Імша, выстаўленне Найсвяцейшага Сакраманта, набажэнства да Найсвяцейшага Сэрца Езуса.
11.00—14.00 — адарацыя Найсвяцейшага Сакраманту, наведванне капліцы святога Юстына.
15.00 — Святая Імша ў інтэнцыі наведвальнікаў рэліквій святога Юстына і парка, набажэнства да святога Юстына.
16.00 —18.00 — працяг адарацыі Найсвяцейшага Сакраманта, святы ружанец у інтэнцыі цвярозасці народа і сем’яў, блаславення Найсвяцейшым Сакрамантам.
19.00 — Святая Імша з урачыстасці святога Яна Хрысціцеля, блаславенне агню, працэсія і запальванне вогнішча.
На працягу ўсяго дня будзе магчымасць паяднання з Богам праз сакрамант споведзі.
Запланавана цікавая забаўляльная праграма, падрыхтаваная культработнікамі
Нядзеля, 26 чэрвеня
12.00 — выстаўленне Найсвяцейшага Сакраманта, чэрвеньскае набажэнства да Сэрца Езуса.
13.00 — урачыстая Святая Імша, працэсія, блаславення.
Ксёндз Марат КАЗЛОЎСКІ,
адміністратар парафіі Мосар.
