Установы адукацыі нашага раёна сталі ўдзельнікамі конкурсу “Зберажом зялёную елку”, усе экспанаты якога, прыгожыя зялёныя елачкі, зроблены з падручных матэрыялаў, другаснай сыравіны, у тым ліку паперы, шышак, пластыкавых бутэлек, стужак і нітак і нават з металу, ільну і трыснёгу.Сваю выставу навагодніх прыгажунь супрацоўнікі аддзела адукацыі спорту і турызму райвыканкама (ініцыятары правядзення конкурсу) размясцілі ў зоне рэкрэацыі на 3 паверсе раённага выканаўчага камітэта, побач са сваім аддзелам.
— Цікавыя работы, прадстаўленыя на конкурс, выклікаюць захапленне ўсіх, хто наведаў нашу выставу,-адзначыла метадыст аддзела адукацыі, спорту і турызму райвыканкама Алеся Уладзіміраўна Грыдзюшка. Удзельнікамі конкурсу сталі ўсе школы і дзіцячыя сады нашага раёна. Некаторыя работы прадстаўлены групай людзей – педагогаў, выхавальнікаў і вучняў. Раённы этап праходзіць у дзвюх намінацыях: адна з іх адпавядае назве конкурснай праграме “Зберажом зялёную елку”, другая – “Навагодняя цацка”. Лепшыя работы яшчэ ў пачатку снежня былі накіраваны на абласны этап конкурсу ў Віцебскі абласны палац дзяцей і моладзі, але і для раённай выставы мы пакінулі вельмі цікавыя і арыгінальныя экспанаты, якія, безумоўна, заслугоўваюць увагі. Дзякуй усім за актыўны ўдзел у нашай экспазіцыі. Незвычайныя навагоднія фантазіі, эксклюзіўныя і разам з тым не зусім “лясныя” прыгажуні, ўздымаюць людзям настрой і служаць своеасаблівым рэкламным ходам для таленавітых аўтараў, якія сталі ўдзельнікамі выставы. А пераможцаў конкурсу выберуць не арганізатары конкурснай выставы, а непасрэдна яе наведвальнікі. На працягу снежня усе жадаючыя могуць прагаласаваць за навагоднюю ёлку, якая найбольш спадабалася. Пераможцаў чакаюць дыпломы аддзела адукацыі, спорту і турызму райвыканкама і памятныя падарункі. Конкурсную выставу можна ўбачыць да пачатку Новага года.
Першачарговая мэта нашага конкурсу – звярнуць увагу людзей на тое, што не абавязкова знішчаць жывыя дрэўцы. Штучная елачка, зробленая сваімі рукамі, стане сапраўдным упрыгожваннем для вашага дома ў канун навагодніх святаў. Зрабіце яе разам са сваімі дзецьмі і не пашкадуеце.
Вольга ЧАРНЯЎСКАЯ.
