У канцы мая ў раённым Цэнтры культуры прайшоў справаздачны канцэрт Шаркаўшчынскай дзіцячай школы мастацтваў. Для педагогаў ён з’яўляецца мерапрыемствам, якое дазваляе падвесці пэўныя вынікі за ўвесь навучальны год, вучням — прадэманстраваць свае навыкі і дасягненні, а бацькам прадстаўляецца магчымасць ацаніць узровень выканаўчага, вакальнага, харэаграфічнага, мастацкага майстэрства сваіх дзяцей.
Гледачам, а асноўную іх частку складалі бацькі навучэнцаў школы, прадэманстравалі відэафільм-справаздачу пра дзейнасць установы за 2016-2017 навучальны год. У ім расказалі пра вучэбны працэс, пра мерапрыемствы, конкурсы і фестывалі, у якіх на працягу года ўдзельнічалі і выкладчыкі школы, і самі навучэнцы. Так, у мінулым годзе адбылося падпісанне дамоўленасці аб супрацоўніцтве паміж Шаркаўшчынскай ДШМ, Шпогскай музычнай і мастацкай школамі (Латвія). Яго вынікам сталі сумесныя пленэры дзіцячай мастацкай творчасці, якія прайшлі вясной і летам 2016 года ў Латвіі і Шаркаўшчынскім раёне. Сёлета таксама плануецца ўдзел вучняў Шаркаўшчынскай ДШМ у сумесным пленэры ў Латвіі.
Дзіцячая школа мастацтваў падтрымлівае цесную сувязь з царквой “Усіх смуткуючых Радасць”. Разам з яе настаяцелем протаіерэем Віктарам Валашчуком ладзяцца калядныя і велікодныя канцэрты на сцэне раённага Цэнтра культуры.
У 2016-2017 навучальным годзе ў Шаркаўшчынскай ДШМ на музычным, харавым, харэаграфічным і мастацкім аддзяленнях навучалася 189 дзяцей. Лепшым вучням, якія дасягнулі значных поспехаў у вучобе, дырэктар установы Жанна Леанідаўна Русак уручыла граматы. Сёлета дзіцячую школу мастацтваў закончылі 18 выпускнікоў. Кожны з іх выказаў са сцэны словы ўдзячнасці і павагі ў адрас педагогаў, расказаў пра самыя яркія і незабыўныя моманты за гады вучобы ва ўстанове. Цяпер кожны з іх выбярэ сваю ўласную дарогу жыцця, прафесію. Хтосьці стане педагогам, нехта ўрачом, спецыялістам іншых галін вытворчасці, некаторыя, атрымаўшы першапачатковую эстэтычную адукацыю, прадоўжаць навучанне ў музычных і мастацкіх ВНУ краіны. Але галоўнае, што юнакам і дзяўчатам назаўсёды запомняцца ўрокі, якія выкладалі для іх таленавітыя педагогі Шаркаўшчынскай дзіцячай школы мастацтваў, запомняцца і, магчыма, спатрэбяцца ў далейшым самастойным жыцці.
Сяргей РАЙЧОНАК.
