Сёлета Полацкая епархія адзначае 1025-годдзе з моманту свайго заснавання. Гэтай даце прысвечаны шэраг святочных мерапрыемстваў. Па благаславенні архіепіскапа Полацкага і Глыбоцкага Феадосія, пры падтрымцы Віцебскага аблвыканкама і гаррайвыканкамаў кананічнай тэрыторыі Полацкай епархіі 16 кастрычніка пачаўся Хрэсны ход з Іконай Божай Маці “Дзісненская Адзігітрыя” і Каўчэгам з часткай правай рукі свяшчэннамучаніка Канстанціна Жданава.
Кожны дзень Хрэснага хода пачынаецца з Божай літургіі. Святыні ўжо ўрачыста сустрэлі жыхары Полацка, Расон, Верхнядзвінска, Міёр, Браслава. 20 кастрычніка а пятнаццатай гадзіне ўдзельнікаў Хрэснага хода віталі праваслаўныя вернікі ў Шаркаўшчыне каля царквы Успення Прасвятой Багародзіцы. Само надвор’е яркімі сонечнымі промнямі нібы ўзрадавалася таму, што шаркаўчане з верай у душы і радасцю ў сэрцы сустракалі святыні. Пасля ў царкве прайшоў малебен і пакланенне Іконе Божай Маці і мошчам святога Канстанціна Жданава.
У сямнаццаць гадзін у раённым Цэнтры культуры пачалася канцэртная праграма “Сэрцы сагравае вера”, прысвечаная 1025-годдзю заснавання Полацкай епархіі. Уладыку віталі старшыня раённага Савета дэпутатаў Уладзімір Серафімавіч Шпец, намеснік старшыні раённага выканаўчага камітэта Юрый Анатольевіч Васілеўскі. Удзел у свяце прыняў архіепіскап Полацкі і Глыбоцкі Феадосій. У танцавальнай зале ўстановы культуры для наведвальнікаў ладзілася выстава творчых работ духоўнага накірунку майстроў раённага Цэнтра рамёстваў, вучняў дзіцячай школы мастацтваў, фатографа Валянціна Гарадзецкага, працавала арт-галерэя Велікасельскай ДС-СШ. Былі прадстаўлены друкаваныя выданні і творчыя работы кіраўніка народнага літаратурна-музычнага аб’яднання “Світанак” Кацярыны Сосна.
— Сёлета горад Полацк адзначае тры знакавыя падзеі, — сказаў са сцэны ўладыка Феадосій, — гэта, у першую чаргу, 1025-годдзе заснавання Полацкай епархіі, 500-годдзе беларускага кнігадрукавання і 1155-гадовы юбілей з моманту першага пісьмовага ўпамінання горада. Архіепіскап заклікаў прысутных найчасцей наведваць храмы, у малітвах успамінаць Бога, любіць і паважаць сваіх родных і блізкіх людзей. Юрый Анатольевіч Васілеўскі ўручыў уладыку Феадосію карціну з выявай Свята-Успенскай царквы і анёла-ахоўніка, напісаную выкладчыкам дзіцячай школы мастацваў Віктарам Фёдаравічам Круком.
Затым на сцэне выступілі выкладчыкі і вучні дзіцячай школы мастацтваў, работнікі культуры, вучні нядзельных школ храмаў Усіх смуткуючых Радасць і Успення Прасвятой Багародзіцы.
На наступны дзень у Свята-Успенскай царкве пачалася ранішняя літургія. Затым вернікі з прывезенымі святынямі Хрэсным ходам пакрочылі па вуліцах гарадскога пасёлка да помніка свяшчэннамучаніку Канстанціну Жданаву, дзе адбылася малітва. Далей Хрэсны ход прадоўжыўся па вуліцах 17 верасня і Чырвонаармейскай. Каля паклоннага крыжа, у скверы ДРБУ-131, вернікі развіталіся са святынямі, якія потым накіраваліся ў Глыбокае.
Здымкі Алены АНАНІЧ и Сяргея РАЙЧОНКА
концерт — https://goo.gl/At1zEa