Цікавае мерапрыемства адбылося нядаўна ў Шаркаўшчынскай раённай бібліятэцы, падчас якога вучні 9 класа Шаркаўшчынскай СШ № 2 пазнаміліся з асобай нашага земяка, ураджэнца былога мястэчка Лужкі Лазара Перэльмана, які ўжо ў дарослым жыцці стаў вядомы як Эліезэр Бэн-Іегуда. З іменем гэтага чалавека звязваюць адраджэнне мовы яўрэйскага народа, якая і стала дзяржаўнай мовай Ізраіля. Цікавае пазнавальнае мерапрыемства для старшакласнікаў разам з загадчыцай аддзела абслугоўвання і інфармацыі Таццянай Міхайлаўнай Райчонак і іншымі супрацоўнікамі бібліятэкі правяла настаўніца гісторыі Шаркаўшчынскай сярэдняй школы № 1 Аксана Анатольеўна Бабоўская.
У наш час як бы само сабой зразумела, што іўрыт – афіцыйная мова Ізраіля. Аднак крыху больш чым 100 гадоў назад яшчэ ніхто не карыстаўся іўрытам ў паўсядзённым жыцці. Толькі яўрэйскія малітвы гучалі на гэтай мове, і яна была, як у наш час, напрыклад, латынь: некалі шырока распаўсюджаны, як гутарковая мова, іўрыт лічыўся “мёртвай” мовай. І ў гісторыі чалавецтва яшчэ не было выпадкаў, каб “мёртвая” мова атрымала такое шырокае распаўсюджанне. Таму Эліезэр Бэе-Іегуда – галоўная фігура ў адным з малавядомых цудаў дваццатага стагоддзя – адраджэнні іўрыта ў якасці “жывой” мовы. А галоўнай справай жыцця гэтага чалавека стала выданне сучаснага слоўніка іўрыту. Падчас гэтай работы Эліезэр Бэн-Іегуда стварыў шмат новых слоў.
Пра ўсё гэта вучні сярэдняй школы № 2 даведаліся падчас сустрэчы ў раённай бібліятэцы. Разам з Аксанай Анатольеўнай Бабоўскай яны ўзгадалі некаторыя найбольш значныя моманты з жыцця нашага вядомага земляка і нават прадэманстравалі іх на сцэне як акцёры. Юнакі і дзяўчаты з цікавасцю слухалі Аксану Анатольеўну, выконвалі розныя цікавыя заданні, што дазволілі дзецям пазнаёміцца з сучаснай дзяржаўнай мовай Ізраіля і даведацца пра найбольш цікавыя факты яе ўтварэння. І нават паразважалі наконт таго, што трэба зрабіць нам, каб пачаць размаўляць на роднай беларускай мове, якая, на жаль, не мае шырокага распаўсюджвання ў сучасным грамадстве. Мерапрыемства было праведзена ў сувязі са 160-годдзем з дня нараджэння нашага земляка, грамадскага дзеяча, мовазнаўцы,адраджальніка старажытнай яўрэйскай мовы іўрыт Эліэзера Бэн-Іегуды, якому на радзіме, у цэнтральным скверы аграгарадка Лужкі ўсталяваны помнік.
Вольга ЧАРНЯЎСКАЯ.
