Маленькія выхаванцы дзіцячага яслі- сада № 4 напярэдадні Дня маці павіншавалі сваіх матуль і бабуль са святам. У якасці віншавання дашкаляты пад кіраўніцтвам педагогаў падрыхтавалі цікавую канцэртную праграму. Дзеці спявалі і танцавалі, з вялікім захапленнем удзельнічалі ў вясёлых тэатралізаваных пастаноўках. Адна з іх пад назвай “Ізноў двойка!” асабліва павесяліла ўсіх прысутных і выклікала бурныя апладысменты гледачоў.Бо дзеці ў жартаўлівай форме прадэманстравалі сваім родным клопаты і турботы дарослых людзей, і, гледзячы на гэтыя сцэнкі з жыцця, нельга было не усміхнуцца. Некалькі яркіх музычных нумароў пад кіраўніцтвам Анжэлы Вацлаваўны Грыгаровіч выканалі юныя артысты, якія ў сваім дзіцячым садку наведваюць гурток “Кропелькі”. Вясёлай і цікавай атрымалася бяспроігрышная латэрэя для бацькоў. Малышы разам з падарункамі, зробленымі сваімі рукамі, падарылі любімым мамам і бабулям цёплыя словы віншаванняў і сваю ўвагу. А самі бацькі, усе без выключэння, былі задаволены як канцэртнай праграмай, так і артыстычнымі здольнасцямі сваіх хлопчыкаў і дзяўчынак. Шчырыя словы ўдзячнасці за падрыхтоўку дзяцей яны выказалі ў адрас усіх супрацоўнікаў дзіцячага сада.
Завяршылася святочнае мерапрыемства агульным бацькоўскім сходам “Што такое дзіцячы сад?”Падчас сустрэчы з бацькамі, супрацоўнікі дзіцячага сада падзяліліся з імі вопытам сваёй работы і пазнаёмілі з планам і задачамі на новы навучальны год. Першы намеснік начальніка Шаркаўшчынскага РАНС Іван Паўлавіч Пальчэх падчас свайго выступлення акцэнтаваў увагу прысутных на выкананні мераў пажарнай бяспекі.
Вольга ЧАРНЯЎСКАЯ.
