Міністэрства абароны праводзіць вялікую работу па прафілактыцы каранавіруса. Аб гэтым сёння заявіў журналістам намеснік міністра абароны Беларусі Сяргей Патапенка, перадае карэспандэнт БЕЛТА.
«Міністэрства абароны праводзіць вялікую работу па прафілактыцы захворвання, праводзіцца шэраг санітарных мерапрыемстваў. Хворыя ёсць, але, як правіла, (каранавірусная інфекцыя. — Заўвага БЕЛТА) праходзіць у лёгкай форме, без сур’ёзных вынікаў. Праблема ёсць, але будзем спадзявацца, што яна нас хутка пакіне», — сказаў намеснік міністра.
Ён таксама адказаў на пытанне аб тым, ці будуць праходзіць каранцін афіцэры запасу, якіх плануецца прызваць у армію ў гэтым годзе. «Штогод прызываем 100 чалавек — афіцэраў, якія скончылі ваенныя кафедры. У войсках яны павышаюць сваю вывучку. Яны будуць прызваны ў розны час — не ўсе адразу. Але да канца года ўсе 100 чалавек будуць прызваны, — расказаў Сяргей Патапенка. — Зразумела, мы ўсіх праверым перад тым, як прызваць. Усе неабходныя мерапрыемствы будуць праведзены. Хворых браць не будзем».
Як паведамлялася, Прэзідэнт Беларусі Аляксандр Лукашэнка 28 мая падпісаў указ нумар 181 «Аб прызыве афіцэраў запасу на ваенную службу». У адпаведнасці з указам неабходна прызваць у бягучым годзе на службу ва Узброеныя Сілы да 100 грамадзян Беларусі мужчынскага полу ва ўзросце да 27 гадоў з ліку афіцэраў запасу, якія не прайшлі тэрміновую ваенную службу, службу ў рэзерве УС і не маюць права на адтэрміноўку ад прызыву.
Міністэрству абароны даручана забяспечыць назначэнне афіцэраў запасу на воінскія пасады. Савет Міністраў да 1 лютага 2021 года павінен прадставіць Прэзідэнту Беларусі інфармацыю аб выніках прызыву.