13 студзеня споўнілася 60 гадоў начальніку Шаркаўшчынскага раённага вузла электрасувязі Дзмітрыю Дзяменцьевічу Цыркіну. Юбілейная дата была адзначана Ганаровымі граматамі Віцебскага абласнога выканаўчага камітэта і Шаркаўшчынскага раённага савета дэпутатаў, які са словамі віншавання ўручыў Мікалай Ірынархавіч Баговіч падчас планёркі ў старшыні райвыканкама. Акрамя гэтага Дзмітрый Дзяменцьевеч атрымаў Ганаровыя граматы РУП “Белтэлекам” і Віцебскага філіяла РУП “Белтэлекам”.
Пра такіх людзей, як Дзмітрый Дзяменцьевіч, кажуць: на працягу жыцця застаўся верным сваёй малой радзіме і аднаму прадпрыемству. Ён нарадзіўся ў Шаркаўшчынскім раёне ў сям’і працаўнікоў сяла. Закончыў Віцебскі тэхнікум электрасувязі і адпрацаваў год па размеркаванні ў Омску, пасля чаго вярнуўся ў родную Шаркаўшчыну, дзе пачаў працаваць у электрасувязі. Прайшоў усе ступенькі службовай лесвіцы: ад электраманцёра сувязі да начальніка раённага вузла. На кіраўнічай пасадзе ён знаходзіцца з 1996 года, выдатна ведае свае абавязкі, калектыў. Таму няма нічога дзіўнага, што яму і пасля дасягнення пенсійнага ўзросту прапанавалі застацца на пасадзе начальніка.
—Пакуль здароўе і сілы дазваляюць, буду працаваць, — кажа Дзмітрый Дзяменцьевіч, — але, вядома, далёка загадваць не атрымліваецца. Адпрацаваў у вузле электрасувязі 38 гадоў і ніколі не шкадаваў пра выбраную спецыяльнасць, ніколі не ўзнікала жадання змяніць месца работы, хоць такія магчымасці былі. У нас склаўся цудоўны калектыў, з якім прыемна працаваць.
Трэба сказаць, што на працягу 12 гадоў Дзмітрый Дзяменцьевіч працаваў на карысць раёна ў Шаркаўшчынскім раённым Савеце дэпутатаў, дзе заўсёды займаў актыўную жыццёвую пазіцыю.
Андрэй БУРЭЦ, фота аўтара.
