Першы ў Беларусі спецыялізаваны экалагічны клас па ўстойлівым выкарыстанні прыродных рэсурсаў “Прырода роднага краю” адкрыўся 27 кастрычніка ў Германавіцкай сярэдняй школе. Дзякуючы гэтаму ў вучняў рознага ўзросту з’явілася ўнікальная магчымасць на новым узроўні вывучаць праблемы экалогіі і паспяхова знаходзіць шляхі іх вырашэння.
— Дзейнасць новага экалагічнага класа ў значнай ступені будзе выконваць інфармацыйную функцыю, прыцягваць увагу шырокіх колаў насельніцтва да глабальных экалагічных праблем, у тым ліку і да захавання ўнікальнага балота “Ельня”, размешчанага на тэрыторыі нашага і суседняга Міёрскага раёнаў,- адзначыла намеснік начальніка аддзела адукацыі, спорту і турызму райвыканкама, куратар праекта Наталля Анатольеўна Арэшкава. — Не так шмат на планеце засталося месцаў, на тэрыторыі якіх ёсць магчымасць захаваць прыроду ў яе першапачатковым, некранутым цывілізацыяй выглядзе. На тэрыторыі нашага раёна такое ўнікальнае месца ёсць. Яго трэба абавязкова зберагчы. Да гэтага і заклікаюць прадстаўнікі Праграмы развіцця ААН ў Беларусі і Фонду Кока-Кола, дзякуючы якім са студзеня 2016 года паспяхова рэалізуецца міжнародны праект «Пастраенне патэнцыялу мясцовых таварыстваў у пытанні ўстойлівага кіравання воднымі рэсурсамі з мэтай захавання балота «Ельня». Асаблівую ўвагу аўтары праекта звяртаюць на вывучэнне і даследаванне водных рэсурсаў: беражлівае расходаванне вады, яе ачышчэне, правядзенне маніторынгу якасці вады ў балоце «Ельня» — адным з самых вялікіх у Еўропе верхавых балотаў. Фінансаванне дадзенага праекта ажыццяўляецца Фондам Кока-Кола па новай партнёрскай ініцыятыве ПРААН і Кока-Колы «Новы свет: ініцыятывы ў галіне інклюзіўнага і ўстойлівага развіцця чалавечага патэнцыялу». Адміністратыўную падтрымку праекта аказвае ПРААН ГЭФ «Кіраванне тарфянікамі на аснове ландшафтных падыходаў з мэтай атрымання шматбаковых экалагічных выгод» («Тарфянікі-2»).
Спецыялізаваны экалагічны клас у Германавічах, які з’явіўся пры фінансавай падтрымцы сумеснага праекта Праграмы развіцця ААН і Фонду Кока-Колы, ўжо на сённяшні дзень забяспечаны сучасным абсталяваннем, інтэрактыўнымі экспанатамі і стэндамі. У прасторным і светлым памяшканні для юных эколагаў устаноўлена новая сучасная аргтэхніка: ноутбук, тэлевізар, фотаапарат, мультыфункцыянальнае тыпаграфскае устройства. У бліжэйшы час там будзе прадстаўлена дадатковая спецыяльная літаратура, іншае неабходнае для работы абсталяванне, у тым ліку і сучасная кампактная метэастанцыя.
Новы экалагічны клас адкрыўся непадалёку ад тэрыторыі заказніка «Ельня». Пры гэтым менавіта ў Германавіцкай сярэдняй школе ўжо даволі працяглы час адным з важных напрамкаў работы з’яўляецца экалагічнае выхаванне моладзі. У названай навучальнай установе гэта дзейнасць рэалізуецца пад кіраўніцтвам настаўніцы біялогіі вышэйшай катэгорыі Марыны Аляксандраўны Фёдаравай. Па ініцыятыве педагога прадстаўнікі школьнага экалагічнага клуба прынялі ўдзел у праекце “Малыя рэкі — вялікія праблемы: працуем разам над аховай і будучым малых рэк басейна ракі Дзісна”, што фінансаваўся Еўрапейскім Саюзам. У школе наладжана цеснае супрацоўніцтва з грамадскай арганізацыяй “Ахова птушак Бацькаўшчыны”, Дзісненскім лясгасам і Германавіцкім лясніцтвам, а таксама з раённай інспекцыяй прыродных рэсурсаў і аховы навакольнага асяроддзя. На тэрыторыі рэспубліканскага ландшафтнага біясфернага заказніка “Ельня” вучні праводзяць свае назіранні, займаюцца даследчай дзейнасцю, рэзультаты якой потым дасылаюць навукоўцам. Таму і невыпадкова, што менавіта ў Германавічах з’явіўся спецыялізаваны экалагічны клас, які дазволіць вучням ўжо на зусім іншым узроўні, больш дакладна і якасна вывучаць асаблівасці прыроды свайго краю і рэгіёну.
На цырымоніі ўрачыстага адкрыцця новага экалагічнага класа прысутнічалі намеснік Міністра прыродных рэсурсаў і аховы навакольнага асяроддзя Ігар Міхайлавіч Качаноўскі, прадстаўнікі Шаркаўшчынскага раённага выканаўчага камітэта, Праграмы равіцця ААН у Беларусі, вытворчага прадпрыемства «Кока-Кола Бевриджис Белоруссия», настаўнікі і вучні Германавіцкай сярэдняй школы, іншыя госці ўрачыстасці, якія не засталіся ў баку ад глабальных экалагічных праблем.
Ад імя кіраўніцтва Шаркаўшчынскага раённага выканаўчага камітэта шчырыя словы ўдзячнасці ўсім, хто займаўся рэалізацыяй праекта «Пастраенне патэнцыялу мясцовых таварыстваў у пытанні ўстойлівага кіравання воднымі рэсурсамі з мэтай захавання балота «Ельня» выказаў намеснік старшыні райвыканкама Юрый Анатольевіч Васілеўскі.
Навучыць юнае пакаленне ашчадна і паважліва адносіцца да навакольнага асяроддзя і жыць у гармоніі з прыродай — асабліва важныя задачы ў нашы дні. З новым сучасным экалагічным класам, аснашчаным усім неабходным, рэалізаваць іх будзе значна прасцей. Наведаць экаклас у Германавічах могуць усе жадаючыя. Дастаткова папярэдне дамовіцца аб гэтым па тэлефоне.
