20 ліпеня прайшоў чарговы адзіны дзень інфармавання насельніцтва, тэмай якога стала “Сацыякультурная палітыка беларускай дзяржавы — ключавы фактар умацавання адзінства нацыі”. Інфармацыйна-прапагандысцкая група ў складзе кіраўніка справамі райвыканкама В. А. Малюгінай, начальніка РАУС С. М. Арэшкава і галоўнага ўрача цэнтральнай раённай бальніцы С. Т. Стомы сустрэлася з працоўным калектывам ДРБУ-131.
Вольга Аляксандраўна расказала прысутным, што Беларусь з’яўляецца краінай з багатай гістарычнай спадчынай, шматвекавымі традыцыямі. Каштоўны ўклад у сусветную культуру ўнеслі Еўфрасіння Полацкая, Кірыла Тураўскі, Сымон Будны, Францыск Скарына, Напалеон Орда, Марк Шагал, іншыя беларусы і ўраджэнцы Беларусі. Кіраўнік справамі паведаміла, што ў сувязі з пераходам сістэмы бюджэтнага фінансавання на праграмна-мэтавы метад рэалізацыі культурнай палітыкі работа вядзецца ў рэжыме жорсткай эканоміі пад канкрэтныя мерапрыемствы, асноўнымі з якіх у нашым раёне з’яўляюцца фестывалі “Яблычны Спас”, “Прыдзісненскія крыніцы”, “Каляровыя сны”, конкурс “Уладар сяла”, цырымонія ўшанавання лепшых працаўнікоў раёна “Чалавек года Шаркаўшчыны” і іншыя. У мэтах захавання і папулярызацыі роднай мовы ў 16 з 22 навучальных устаноў раёна выхаванне і навучанне вядзецца на беларускай мове. У нашай краіне створаны ўмовы для развіцця самадзейнай народнай творчасці. Наш раён на мерапрыемствах рознага ўзроўню дастойна прадстаўляюць дзевяць калектываў з найменнем “народны” і “узорны”, раённы Цэнтр рамёстваў, Дом ганчара. На тэрыторыі раёна размешчана 19 помнікаў, занесеных у спіс гісторыка-культурнай спадчыны Рэспублікі Беларусь. Праводзіцца мэтанакіраваная работа па развіцці міжнароднага супрацоўніцтва ў сферы культуры. У межах падпісаных дамоўленасцей дарослыя і дзіцячыя творчыя калектывы нашага раёна праводзяць сумесныя мерапрыемствы са сваімі калегамі з Латвіі. Сёлета на фестываль “Яблычны Спас” чакаецца прыезд гасцей з Латвіі, Літвы, Эстоніі, Расіі.
Прэзідэнт краіны А. Р. Лукашэнка падчас звароту да беларускага народа і парламента сказаў: “У беларускага народа выдатная літаратура, музыка, жывапіс, архітэктура, якія нас падпітваюць і якімі мы ганарымся. Нам засталася ў спадчыну гераічная гісторыя, якую неабходна памятаць, папаўняць новымі здзяйсненнямі, каб з годнасцю перадаць будучым пакаленням беларусаў”.
Пра стан злачыннасці ў раёне расказаў начальнік РАУС Сяргей Мікалаевіч Арэшкаў. Галоўны ўрач цэнтральнай раённай бальніцы Станіслаў Тадэвушавіч Стома паведаміў пра медыцынскае абслугоўванне ва ўстановах аховы здароўя, метады лячэння захворванняў.
Сяргей РАЙЧОНАК.